Huan dhe Ignacio janë dy vëllezër, tifozë argjentinas, të cilët udhëtuan nga Buenos Aires drejt Katarit për të mbështetur Mesin dhe shokët e tij në finalen e Kupës së Botës kundër Francës. Gëzimit për suksesin botëror iu shtua edhe kënaqësia që morën me vete në Argjentinë topin me të cilin idhulli i tyre Lionel Mesi shënoi golin e avantazhit të çastit 3-2.
Gjithçka ndodhi falë Dibala, i cili për të ndalur një aksion të Mbape e goditi topin fort dhe “sfera” përfundoi në tribunë. Më saktësisht, topi përfundoi vetëm pak hapa larg dy vëllezërve.
“Në fakt nuk e morëm ne të parët, por një francez. Unë i shpjegova se topi duhej t’i kthehej policisë, francezi ma dorëzoi mua dhe më pas nuk mund ta jepja për asgjë në botë,” i tha shtypit argjentinas njëri nga dy vëllezërit.
Ata nuk u dorëzuan as përballë kërkesave të organeve të rendit.
“Një nga policët erdhi të më kërkonte, por nuk mund t’ia jepja. Dhe kur erdhi mbikëqyrësi i tifozëve më tha: Mirë, topi është i yti”.
Dy vëllezërit e mbajnë topin me xhelozi dhe tashmë kanë refuzuar një ofertë prej 21.000 dollarësh (më shumë se 19.000 euro) nga sheikët e Katarit. I vetmi të cilit mund t’ia japin është Messi. Nëse kapiteni argjentinas do t’ua kërkonte, dy vëllezërit garantojnë se do të ishin gati t’ia “çonin në Rosario edhe në këmbë”.
