Në një periudhë ku minimalizmi është kthyer në trend, duke filluar nga gardëroba tek arredimi i shtëpisë, ndoshta ka ardhur koha të aplikojmë këtë koncept edhe në jetën emocionale. Shpesh ndiejmë se jemi të ngarkuar jo vetëm me gjëra materiale, por edhe me emocione të tepërta. Por çfarë është minimalizmi emocional dhe si mund ta përfshish në përditshmërinë tënde?
Minimalizmi emocional është koncepti i eliminimit të emocioneve të panevojshme që të rëndojnë. Siç largojmë gjërat e panevojshme nga jeta jonë materiale, po ashtu duhet të eliminojmë emocionet që nuk na sjellin asnjë përfitim ose qetësi. Është një mënyrë për të ndaluar së mbushuri mendjen me ndjenja që vetëm shkaktojnë lodhje.
Si të identifikosh emocionet e panevojshme?
Emocione si ankthi për të ardhmen, faji për të shkuarën, apo zemërimi ndaj situatave që nuk i ke nën kontroll, janë vetëm disa shembuj të ndjenjave që nuk të çojnë askund. Këto ngarkesa të padobishme të mbajnë të lidhur dhe të bëjnë të ndihesh i/e bllokuar në përditshmërinë tënde.
Si ta praktikosh minimalizmin emocional?
Reflekto mbi ndjenjat e tua: Çdo herë që ndihesh i/e mbingarkuar, pyet veten: “A po të shërben kjo ndjenjë?”; “A të ndihmon në zgjidhjen e situatës apo thjesht po të rëndon?”. Ky reflektim të ndihmon të kuptosh çfarë emocionesh ia vlen të mbash dhe cilat duhet t’i lësh pas.
Largo emocionet e tepërta: Ashtu si heq sendet e panevojshme nga dhoma jote, provo të largosh mendimet dhe emocionet që nuk të sjellin qetësi. Kjo nuk do të thotë të mos ndjesh asgjë, por të mbash vetëm ato që të ndihmojnë të ecësh përpara.
Përqendrohu te ndjenjat pozitive: Emocione si mirënjohja, dashuria dhe qetësia shpirtërore janë ato në të cilat duhet të përqendrohesh. Ato të japin energji dhe të ndihmojnë në ndërtimin e jete më të lehtë dhe më të lumtur.
A po e mbingarkon jetën tënde me emocione të panevojshme?
Në shumë raste, emocionet që na shoqërojnë çdo ditë janë të tepërta dhe thjesht na rëndojnë mendërisht dhe shpirtërisht. Pyet veten nëse këto ndjenja të shërbejnë në ndonjë mënyrë.
Minimalizmi emocional të ndihmon të përballosh më pak ngarkesë emocionale, duke të dhënë më shumë hapësirë për qetësi dhe gëzim. Ashtu si heqja dorë nga sendet e tepërta, largimi i emocioneve të panevojshme është çelësi për të përjetuar më shumë lumturi dhe qetësi në përditshmërinë tënde.
Burimi: botasot.info
