Në seancën e parë të Këshillit Drejtues të projektit “BE për komunat” të kryesuar nga ministri i vetëqeverisjes lokale Goran Milevski u konfirmua se në tre vitet e ardhshme në komunat Veles, Radovish, Tetovë, Aerodrom, Vrapçisht, Ohri, Strumica dhe qyteti i Shkupit do të realizohen projekte të mëdha inovative me vlerë 5.5 milionë euro.
Mjetet për realizimin e projekteve janë siguruar nga Bashkimi Evropian, ndërsa bashkëfinancimi prej 15 për qind mbulohet nga Ministria e Vetëqeverisjes Lokale me mbështetjen e Agjencisë Zvicerane për Zhvillim dhe Bashkëpunim.
“Falë mbështetjes nga BE-ja, zbatimi i këtyre projekteve do të sjellë një ndryshim thelbësor në cilësinë e jetës në këto komuna. Ministria e Vetëqeverisjes Lokale, duke u nisur nga interesi i komunave dhe përfitimi për qytetarët, pranoi sfidën që të sigurojë bashkëfinancimin prej 15 për qind, në të cilin na ndihmoi Agjencia Zvicerane për Zhvillim dhe Bashkëpunim, duke i dhënë kështu një mundësi komunave më të vogla të cilat vështirë se mund t’i sigurojnë këto mjete”, tha ministri i Vetëqeverisjes Lokale Milevski, i cili theksoi dobinë e madhe të mbështetjes teknike të ofruar nga Bashkimi Evropian si garanci për realizimin e suksesshëm të projekteve.
Përfaqësuesi i Delegacionit të BE-së, Stephen Hudolin, theksoi se komunat kanë treguar interes të madh, me 58 aplikime për thirrjen publike.
