Izet Mexhiti, një nga deputetët e fraksionit brenda BDI-së u nda nga ky subjekt politik dhe që sot ka filluar procedurën për formimin e një lëvizjeje të re dhe këtë e konfirmoi për TV21. Qëllimi i Lëvizjes në krye me Mexhitin është bashkimi i frontit opozitar, duke paralajmëruar se do të jetë një lëvizje demokratike, e cila do të artikulojë ndryshe opinionin. Në këtë rrugëtim Mexhiti nuk e ka përkrahjen e Blerim Bexhetit i cili u shpreh kundër ndarjes nga BDI, mirëpo mbështetje ka gjetur te deputeti i pavarur Kastriot Rexhepi, i cili për TV21 deklaroi se do të jetë bashkëthemelues i kësaj lëvizjeje.
“Zotëri Bexheti në emër të zotëri Xhaferit dhe zotëri Bejtës u deklarua se ata do të vazhdojnë të mundohen të funksionojnë brenda BDI-së, unë ju uroj suksese. Këtu na ndahen rrugët pra, për momentin ata mbeten si fraksion apo kthehen në BDI, përgjigjen duhet ta japin ata pse dhe si, ndërsa ne deklarohemi se janë shterur të gjitha mundësitë për funksionim brenda BDI-së, prandaj dorëhiqemi nga gjithçka në BDI, nuk jemi anëtarë të BDI-së dhe prej sot është një fillim i ri, faqe e re”, tha Mexhiti për TV21.
Burimi: TV21
