Kryetari i komunës së Çairit dhe njëri nga liderët e VLEN, Izet Mexhiti ka thënë se sistemi “Safe city, ka qenë iniciativë e mëhershme, nuk është sot për sot.
Sipas tij, dukshëm janë ulur shkeljet, me tendencë brenda muajit të ketë vetëm 6 mijë shkelje.
“Kjo po jep efektet, kur shohim shpëtimin e jetëve, sepse qëllimi final nuk është të dëmtohen qytetarët. Nuk ka komponentë etnike, ideja është të shtrohet në tërë territorin e Maqedonisë së Veriut. Nuk do të lejojmë që të ketë komponentë etnike”, tha Mexhiti.
Pa marrë parasysh akuzat e opozitës, sipas Mexhitit gjuha shqipe duhet të implementohet deri në fund në sistemin “Safe city”.
“Është sistem provë dhe duhet të implementohet dygjuhësia e plotë. Në takimin e liderëve, opozita ka dhënë mbështetje të plotë për votimin e “Safe cityt”, ka thënë Mexhiti.
Lidhur me pjesëmarrjen e Bilall Kasamit në takimin e liderëve, Mexhiti tha se ai ka propozuar që Kasami të delegohet në atë takim.
“Jemi 4 deri në 6 liderë, 4 nuk mund të shkojmë dhe kemi paraparë një lider dhe shefi i grupit parlamentar të marrë pjesë. Propozimi im ka qenë që të shkojë Bilall Kasami dhe kjo është punë ekipore”, ka thënë Mexhiti.
