Kryetari i Komunës së Çairit, Izet Mexhiti, së bashku me kryetarin e Qytetit të Shkupit, Orce Gjorgjievski, kanë zhvilluar takim me përfaqësues të bizneseve që veprojnë në zonën e Vizbegut.
Në fokus të takimit ka qenë projekti për ndërtimin e rrugës magjistrale transitore “Hasan Prishtina”, e cila, sipas Mexhitit, përbën një nga projektet më të rëndësishme infrastrukturore për këtë pjesë të Shkupit.
“Gjatë ditës, bashkë me kryetarin e Qytetit të Shkupit, Orce Gjorgjievski, ishim në Vizbeg, ku u takuam dhe biseduam me përfaqësuesit e bizneseve që veprojnë në këtë zonë”, ka njoftuar Mexhiti.
Ai bëri të ditur se gjatë takimit është diskutuar për rëndësinë e rrugës “Hasan Prishtina” dhe ndikimin që ajo pritet të ketë në qarkullimin dhe zhvillimin ekonomik të zonës së Vizbegut.
“Në fokus ishte një prej projekteve më të rëndësishme infrastrukturore për këtë pjesë të Shkupit, rruga magjistrale transitore ‘Hasan Prishtina’”, theksoi Mexhiti.
Sipas tij, rruga e re do të ketë një gjatësi prej rreth 3.5 kilometrash dhe do të ndërtohet me katër korsi. Mexhiti vlerëson se projekti do të krijojë kushte më të mira për funksionimin e bizneseve dhe do të lehtësojë qarkullimin në këtë zonë.
“Rruga e re, me gjatësi prej afro 3.5 kilometrash dhe katër korsi, do t’i sjellë Vizbegut infrastrukturë moderne, do të lehtësojë qarkullimin dhe do të krijojë kushte shumë më të mira për funksionimin dhe zhvillimin e bizneseve në këtë zonë”, deklaroi Mexhiti.
Ai theksoi gjithashtu rëndësinë e projektit për lidhjen e Shkupit me pikën kufitare Bllacë dhe Kosovën.
“Njëkohësisht, Shkupi do të ketë një lidhje më të shpejtë dhe më të mirë drejt Bllacës dhe Kosovës”, tha kryetari i Çairit.
Burimi: alfax.mk
