Një investim prej 200 milionë eurosh për rrugën Shkup–Bllacë–Prishtinë është paralajmëruar nga bashkëkryetari i VLEN-it dhe kryetari i Komunës së Çairit, Izet Mexhiti, i cili e ka cilësuar projektin si një hap të madh drejt afrimit ekonomik dhe infrastrukturor mes Shkupit dhe Prishtinës.
Përmes një statusi publik në facebook, Mexhiti ka theksuar se ky investim dëshmon ndryshimin mes premtimeve politike dhe realizimit konkret në terren, duke vënë në pah se fokusi mbetet te projektet që ndikojnë drejtpërdrejt në jetën e qytetarëve.
“Shkupi tashmë më afër Prishtinës”, ka shkruar Mexhiti, duke nënvizuar se ndërtimi i korridoreve rrugore nënkupton më shumë mundësi për zhvillim ekonomik, qarkullim më të shpejtë dhe lidhje më të forta mes vendeve.
Sipas Mexhitit, investimet në infrastrukturë krijojnë perspektiva të reja për qytetarët dhe hapin horizonte të reja për gjeneratat që vijnë.
