Dega e Partisë Demokratike të Kosovës në Komunën e Malishevës, ka mbajtur sot Kuvendin zgjedhor ku ka zgjedhur kryetarin e ri të saj.
Pas një gare fer e demokratike, ndërmjet Mevludin Mazrekut dhe Hashim Vrenezit, delegatët me shumicë votash zgjodhën Mazrekun për të udhëhequr me Degën e PDK-së në Malishevë.
Në emër të Kryesisë qendrore të PDK-së, punimet e këtij kuvendi zgjedhor i përshëndeti nënkryetari i PDK-së, Uran Ismaili. Ai tha se PDK po reformohet e po hapet anekënd Kosovës për të ndërtuar vizionin e ri, për të ardhmen e vendit.
Ismaili e ka falënderuar kryetarin e deritashëm të PDK-së në Malishevë, Isni Kilaj, për punën e palodhshme, ndërsa ka ftuar Kryetarin e ri të degës që të punojë shumë për reformat e nevojshme për të ndërtuar ekipin dhe programin e duhur për të ardhmen e Malishevës.
Ndërsa, kryetari i ri i PDK-së në Malishevë, Mevludin Mazreku, pasi mori besimin e delegatëve, i ka falënderuar të gjithë për besimin e dhënë dhe u zotua se bashkë me të gjithë aktivistët e degës, do të punojnë në konsolidimin e plotë të strukturave përkatëse.
Mazreku tha se Komuna e Malishevës prej shumë vitesh ka stagnuar së zhvilluari dhe vazhdon të qeveriset pa plan e ide për zhvillim e transformimin që i duhet.
Ai tha se PDK si parti e cila ka brenda vetës njerëz me përvojë e kompetencë, do të jetë pranë qytetarëve të Malishevës dhe do të ofrojë programin më të mirë dhe njerëzit e duhur për të fituar zgjedhjet e ardhshme dhe për ta ndryshuar gjendjen e stagnimit në këtë komunë.
Mazreku tha se vizioni i tij për degën e PDK-së në Malishevë është hapja ndaj ideve të reja dhe ndaj profesionistëve të rinj të cilët i ftoi t’i bashkohen këtij rrugëtimi për të ardhmen e Malishevës.
