Kreu i PL-së, Ilir Meta në një konferencë për mediet ditën e sotme deklaroi se mbështet primaret edhe pse është një proces i vonuar sipas tij, që duhet të ishte bërë më parë. Ai theksoi se përgjegjësinë për primaret e mban Sali Berisha, pasi është ky i fundit që i ka ideuar, por shqiptarët presin vetëm fitoren.
Meta: Kam lavdëruar gjithmonë primaret. Duhet të jemi të kujdesshëm në kushtet e një regjimi mafioz dhe fashist. Vulën e PD-së e mban në xhep Edi Rama dhe e përdor kundër opozitës dhe pluralizmit. Kam thënë që e mban Sali Berisha përgjegjësinë, që do të thotë se shqiptarët nuk presin primaret nga Berisha dhe Meta, por fitoren.
Prandaj është ai që mban përgjegjësinë se është ai që e ka ideuar. Është një proces i vonuar, megjithatë duhet të bëjë çdo gjë që kjo çështje të zgjidhet sa më parë se kemi të bëjmë me një shtet fashist. I kam thënë sot Berishës që çdo kandidat që kandidon në primare dhe përpiqet të dëmtojë kolegun e tij, të largohet nga gara.
Jemi shumë të qartë dhe marrëveshja jonë që tashmë është e përfunduar i intereson gjithë shqiptarëve, jo vetëm opozitarëve. Është një binom i jashtëzakonshëm, primare dhe referendum. Firmat tona mbi një marrëveshje të tillë japin siguri.
