Trupa të shumtë janë gjetur në dhe rreth qytetit Monterrey në Meksikë, raporton Anadolu.
Trupat janë gjetur në disa lokacione të ndryshme në Monterrey dhe rrethinën e saj, përfshirë edhe disa nga lagjet e pasura, njoftuan zyrtarët.
Monterrey është kryeqyteti i shtetit federal meksikan Nuevo Leon dhe është rajoni i tretë metropolitan më i madh në Meksikë.
Zyrtarët shtetërorë në Nuevo Leon thanë se u gjetën të paktën shtatë trupa si dhe pesë çanta me pjesë trupi.
Ata shtuan se nuk mund të japin numrin e saktë të të vdekurve, pasi disa trupa janë gjetur të copëtuara.
Zyrtari i lartë i sigurisë së shtetit, Gerardo Palacios tha se besojnë se trupat mund t’i përkasin anëtarëve të ndonjë karteli droge në shtetin Tamaulipas.