Ministria e Industrisë, Ndërmarrësisë dhe Tregtisë bëri të ditur të premten se Komisioni për Shqyrtimin e Ankesave për Regjistrimin e Bizneseve ka refuzuar ankesën e Klan Kosova lidhur me pezullimin e certifikatës së biznesit së televizionit.
Kallëzimi penal i Ministrisë ishte ngritur me “pretendimin se në certifikatën e biznesit, te ndërrimi i pronarëve, figuron Pejë – Serbia dhe Gjakovë – Serbia”.
Në mesin e reagimeve të shumta kryesisht në mbrojtje të televizionit në fjalë, një reagim ndryshe e pati publicistja Kimete Berisha.
Ajo në një postim në Facebook, shkroi se nuk ka liri nëse mohohet shteti.
Kështu, sipas publicistes, është tragjedi e madhe që Kosova t’i nënshtrohet parapëlqimit të një tregtari që preferon të jetë shtetas i Serbisë.
“Nëse ia bëjmë qejfin një milioneri dhe plus me paret tona ia paguajmë qejfin që të jetë shtetas i Serbisë, dalëngadalë, duke i konsideruar shkeljet kushtetuese si gabime teknike – një ditë mund të bëhet ‘normale’ që Kosova të konsiderohet e Serbisë!”, shkroi mes tjerash Berisha
Postimi i plotë:
Ankthi i Lirisë!
Më vjen shumë keq për fjalën e Lirë, por Gjakova nuk është në Serbi!
Fjala e lirë duhet të jetë e vërtetë! Përndryshe, fjala e lirë – por e pavërtetë, është pallavër dhe të çon në robëri!
Ku ke parë këso Lirie që e mohon shtetin e vet.
Edhe nëse krejt bota çohen në këmbë dhe thonë se është normale që pronari i një media kombëtare shqiptare e konsideron veten gjakovar i Serbisë, e Kosovën – Serbi – ne nuk bën të pranojmë se Kosova është Serbi, se nuk është.
Nëse ia bëjmë qejfin një milioneri dhe plus me paret tona ia paguajmë qejfin që të jetë shtetas i Serbisë, dalëngadalë, duke i konsideruar shkeljet kushtetuese si gabime teknike – një ditë mund të bëhet ‘normale’ që Kosova të konsiderohet e Serbisë!
Është tragjedi e madhe që Kosova t’i nënshtrohet parapëlqimit të një tregtari që preferon të jetë shtetas i Serbisë.
Le të jetë.
Ji i Serbisë, ji ti i kujtdo që ta do zemra, por jo në emrin e lirisë së fjalës ta mohosh shtetin e Kosovës.
Të isha gazetare e Klanit, e para do të largohesha nga një pronar që Kosovën e konsideron Serbi.
Sot Klan Kosovën po e mbrojnë veç gazetarët e saj, e pronari po hesht.
– Dil zotëri e trego çka dreqi ke nuk e ndryshon shtetësinë!
Unë prita se për një muaj do të bëhesh shtetas i Kosovës!
P.S. Liria e tepërt është robëri. (PLATO)
