Mbreti Charles III mbërriti në Irlandën e Veriut të martën, duke mbajtur zi kombëtare për nënën e tij, Mbretëreshën Elizabeth II, arkivoli i së cilës do të transportohet nga Edinburgu në Londër në mbrëmje, ku do të ekspozohet për katër ditë, në mënyrë që njerëzit t’i thonë lamtumirë saj.
Mbreti Charles III, 73 vjeç, do të vizitojë katër pjesë të Mbretërisë së Bashkuar përpara funeralit të Mbretëreshës më 19 shtator.
Në Irlandën e Veriut, njerëzit u mblodhën në rrugët jashtë Kalasë Hillsborough, rezidenca zyrtare mbretërore, përpara mbërritjes së tij.
“Ne erdhëm për t’i bërë nderimet tona Mbretëreshës Elizabeth sepse ajo ishte një mbretëreshë fantastike dhe shumë besnike ndaj Irlandës së Veriut dhe ne donim të ishim këtu për të mirëpritur mbretin e ri,” tha Heather Paul, 61-vjeç, duke mbajtur lule dhe një flamur britanik.
Joy Hutchinson, 34-vjeç, tha se shpresonte që Charles ta mbante vendin të bashkuar.
Charles udhëtoi me makinë nëpër rrugët e Hillsborough dhe më pas doli nga makina për të shtrënguar duart me qytetarët të cilët brohorisnin “Zoti ruaj Mbretin”.
Ai mbërriti në Irlandën e Veriut nga Skocia, ku shoqëroi arkivolin e Mbretëreshës në këmbë në një procesion solemn nga Kalaja e Edinburgut deri në Katedralen e St. Egidia, ku mori pjesë në një vigjilje dhjetë minutëshe.
Elizabeth vdiq të enjten në Kalanë Balmoral në Skoci në moshën 96-vjeçare, pasi mbretëroi për më shumë se 70 vjet.
Charles, i cili automatikisht u bë mbret i Mbretërisë së Bashkuar, do të bashkohet në Irlandën e Veriut nga kryeministrja e re Liz Truss.
Në Belfast, ai do të takohet me politikanë të rangut të lartë dhe udhëheqës fetarë dhe do të marrë pjesë në meshën në Katedralen e St. Anne para se të kthehej në Londër.
Arkivoli i Mbretëreshës do të transportohet nga Skocia në Londër herët sonte dhe më pas në Pallatin Buckingham. Të mërkurën, së bashku me një procesion të madh ushtarak, do të zhvendoset në Westminster, salla më e vjetër e Parlamentit Britanik, ku do të ekspozohet për publikun deri më 19 shtator.
