Marta Kos, kandidatja e Sllovenisë për komisionere të BE-së, mori dritën jeshile në parlament pasi Komisioni i Çështjeve të BE-së votoi me 9 vota pro dhe 5 kundër në dhënien e opinionit të tij jodetyrues.
Votimi erdhi pas katër orë e gjysmë debati në të cilin Kos paraqiti vizionin e saj për portofolin e zgjerimit që iu caktua nga presidentja e Komisionit, Ursula von der Leyen.
Kos e siguroi komisionin për plotësimin e kërkesave kryesore në rolin e komisioneres evropiane – duke e përshkruar veten si një “evropiane të përkushtuar”.
“Caktimi i një portofoli kaq të rëndësishëm eshtë një votë besimi e rëndësishme për Slloveninë”, tha Kos.
“Për mua, zgjerimi është sinonim i BE-së dhe BE është sinonim i paqes. Për më tepër, paqja përfaqëson stabilitetin, sigurinë, të ardhmen, lidhjen dhe përfshirjen”, shtoi Kos.
Kos vuri në dukje se integrimi i suksesshëm i Sllovenisë në BE mund të shërbejë si një shembull i vlefshëm për vendet e tjera të Ballkanit Perëndimor që aspirojnë të anëtarësohen.
Ajo theksoi se përparimi i Sllovenisë dhe BE-së është i ndërlidhur me përparimin dhe zhvillimin e fqinjëve të saj.
E pyetur për specifikat, ajo shprehu dyshimin se të gjitha vendet kandidate do të jenë në gjendje të bashkohen me bllokun deri në vitin 2030, por tha se zgjerimi i BE-së ishte një përparësi strategjike, ekonomike dhe e sigurisë.
“Ne dëshirojmë përparim në Ballkanin Perëndimor dhe hapjen e kapitujve të rinj për Maqedoninë e Veriut, Shqipërinë, Serbinë, Kosovën dhe Bosnjë-Hercegovinën”, tha ajo.
Përsa i përket Ukrainës, ajo tha se mbështetja e Evropës për Ukrainën ishte e padiskutueshme pasi lufta atje kishte të bënte gjithashtu me sigurinë, lirinë dhe vlerat e Evropës.
“Ky është një konfirmim se mbështetja financiare, politike dhe ushtarake e BE-së për Ukrainën do të vazhdojë për aq kohë sa të jetë e nevojshme”, tha Kos
