Banesa, shtëpi, arkitekturë, ndërtim, mobilieri, artikuj betoni, banka, sanitari, shëndetësi e punës, fasada, dyer e dritare, prodhime të tarracave, elektrikë, pllaka e parket, ngjyra, ashensorë, prodhime metalike, ndriçim, janë disa nga artikujt që do të jenë pjesë e panairit “Marketi i Ndërtimit”, i cili po organizohet për herë të parë në Kosovë.
Në sallën 1 Tetori, mbi 30 kompani liderë, do të marrin pjesë në këtë panair, i cili do të hapë dyert për qytetarët që nesër, më datë 31 korrik deri më më 2 gusht, e ku do të ketë zbritje të jashtëzakonshme për qytetarët në artikuj të ndryshëm.
Organizatori i panairit “Marketi i Ndërtimit”, Avdullah Hasani tha për KosovaPress, se ky organizim ka për qëllim që qytetarët të përfitojnë sa më shumë nga ofertat e jashtëzakonshme që i kanë kompanitë pjesëmarrëse.
Hasani: Qytetarët do të përfitojnë nga ofertat e jashtëzakonshme
“Marketi ka për qëllim rritjen e intensitetit të shitjes së produkteve për kompanitë prezente, si dhe qytetarët të përfitojnë zbritje nga ofertat që iu ofrojnë kompanitë pjesëmarrëse të produkteve të ndërtimit. Kjo me qëllim që qytetarët të përfitojnë sa më shumë nga ofertat e jashtëzakonshme që i kanë kompanitë pjesëmarrëse. Marketi i formës së tillë po bëhet për herë të parë në Kosovë dhe ka për qëllim zhvillimin tradicional me një intensitet dhe sasi më të madhe për vitin e ardhshëm. Realisht, po e vërejmë një disponim të qytetarëve që kërkesat t’i trajtojnë me ofertat serioze të jashtëzakonshme që i kanë kompanitë pjesëmarrëse në market”, tregoi Hasani.
Organizatori tregoi se se si mund të përfitojnë qytetarët në nga këto kompani në panair.
Hasani: Kompani të ndryshme kanë shumë oferta për konsumatorë
“Përveç kompanive të ndërtimit, ka kompani edhe të derivateve, që ofrojnë zbritje për kompanitë e ndërtimit, ka kompani të pastrimit, kompani të ndërtimit të banesave dhe shtëpive. Është një spital që ofron zbritje dhe oferta të tjera, për kompanitë prezente për produktet që lidhen më kompanitë e ndërtimit edhe sipas legjislacionit në fuqi”, u shpreh organizatori i këtij panari.
Ai shtoi se pritshmëritë që ky panair të ketë sukses janë shumë të mëdha.
Hasani: Presim që panairi t’i kalojë pritshmëritë tona
“Nga ajo që e kemi vërejtur deri më tani, nga interesimi i qytetarëve por edhe i kompanive të tjera që priten të vijnë edhe si vizitorë, kompanitë e tjera përveç pjesëmarrësve. Besojmë që Marketi do të kalojë pritshmërinë që ne e kemi”, tha Hasani.
Sa i përket idesë se si ka ardhur që ky panair të quhet “Marketi i Ndërtimit”, Hasani tha se forma, qëllimi dhe mënyra e organizmit, është unike sepse nuk ka të bëjë vetëm me ekspozimin por edhe me trajtimin dhe shitjen.
Përveç shumë kompanive pjesëmarrëse, Marketit sot iu bashkuan edhe ERTA INVEST e drejtuar nga Mustaf Grainca, si dhe Pozhegu Brothers.
Panairi do të jetë i hapur nga ora 10:00 deri në 18:00.
