Ministria e Punëve të Brendshme ka marrë pjesë në operacionin ndërkombëtar “FIRSTLIGHT 2026”, të koordinuar nga INTERPOL-i, kundër mashtrimeve online dhe pastrimit të parave, përcjell TV21. Operacioni është zhvilluar nga 15 janari deri më 30 prill të këtij viti dhe ka përfshirë institucione kompetente nga 97 shtete dhe territore, me qëllim zbulimin dhe goditjen e mashtrimeve të bazuara në inxhinierinë sociale dhe aktiviteteve të lidhura me pastrimin e parave.
Sipas MPB-së, këto mashtrime funksionojnë përmes keqpërdorimit të besimit të qytetarëve dhe kompanive për përfitime të paligjshme financiare ose për marrjen e të dhënave të ndjeshme. Në këtë kategori përfshihen mashtrimet përmes postës elektronike të kompanive, mashtrimet investuese, ato romantike, paraqitja e rreme dhe forma të tjera të krimit online. Gjatë operacionit në nivel global u arrestuan 5.811 persona, u identifikuan më shumë se 142 mijë viktima, ndërsa u bllokuan mbi 31 mijë llogari bankare. Autoritetet arritën të ndërpresin transaksione të paligjshme me vlerë rreth 293 milionë dollarë amerikanë.
Burimi: alfax.mk
