Çmimet e konsumit në tetor 2022, krahasuar me të njëjtin muaj të një viti më parë, janë mesatarisht 16,8 për qind më të larta, tregojnë të dhënat e reja të Entit të Statistikave – Monstat.
Kjo do të thotë se rritja e çmimeve, e cila është në zonën e hiperinflacionit që prej muajit prill, ka vazhduar rrugën e saj marramendëse.
“Çmimet e produkteve dhe shërbimeve të konsumit personal, të matura me indeksin e çmimeve të konsumit, në muajin tetor në krahasim me shtatorin kanë qenë mesatarisht 1.4 për qind më të larta. “Çmimet e konsumit në periudhën janar-tetor të këtij viti, krahasuar me të njëjtën periudhë të vitit 2021, janë mesatarisht më të larta për 12,2 për qind”, saktësohet në raport.
Kujtojmë se inflacioni vjetor në muajin e nëntë të këtij viti ishte 16 për qind, ose 11.6 për qind kur krahasohen të dhënat e janarit deri në shtator të vitit të kaluar dhe të këtij viti.
Të dhënat e Monstat tregojnë se ndikimin më të madh në rritjen mujore të çmimeve e ka pasur rritja e çmimeve të qumështit dhe vezëve, e ndjekur nga veshjet, mishi dhe këpucët.
Konkretisht, në muajin tetor krahasuar me shtatorin, rritje më të madhe kanë shënuar çmimet e veshjeve dhe këpucëve (7.3%), mallrave dhe shërbimeve të tjera (3.8%), arsimit (3.1%), mobilieve, pajisjeve shtëpiake dhe mirëmbajtjes (2.6%), ushqimi dhe pijet joalkoolike (1.8%) dhe shëndetësia (1%), ndërsa rënien më të madhe e kanë shënuar restorantet dhe hotelet (4.7%). Çmimet e produkteve dhe shërbimeve të tjera nuk ndryshuan ndjeshëm.
