Nënkryetari i Lidhjes Demokratike të Kosovës, njëherish edhe kryetari i degës së kësaj partie në Gjilan, Lutfi Haziri, ka folur në një konferencë për media, lidhur me dështimin siç e quan ai, të komunës së Gjilanit, rreth fillimit dhe vazhdimit të disa projekteve në këtë komunë.
Haziri ka thënë se autostrada e Gjilanit ka stagnuar dhe për këtë ka fajësuar komunën që drejtohet nga Alban Hyseni i Lëvizjes Vetëvendosje, të cilin e portretizon si të painteresuar totalisht, e bashkë me të dhe qeverinë e Kurtit, të cilët thotë se nuk u angazhuan konkretisht lidhur me çështjen.
“Autostrada e Gjilanit ka mbetur në stagnim, përshkak të mospërfundimit të angazhimeve konkrete të qeverisë dhe për shkak të mosinteresimit total të komunës, për t’i dhënë shtytje dhe buxhetim përfundimit të fazës së parë të punimeve, prej Lipjanit në drejtim të Bresalcit dhe moshpallja dhe mosnjoftimi prej Gllamës në drejtim të Konçulit, që është faza e dytë dhe me këtë projekt zhvillimor jo vetëm që lidhet Kosova Lindore dhe Anamorava me qendrën e Kosovës por edhe ndërtohet qarkorja e Gjilanit.
Të cilin projekt ne e kemi zhvillu por që tani nuk ka asnjë lloj tendence, që mund të na sigurojë se do të zhvillohet tutje“, ka thënë ish-kryetari i Gjilanit
