Gjashtë muaj të pushtetit të VMRO-DPMNE-së, nuk është bërë asgjë në drejtim të luftës kundër ajrit të ndotur – thonë nga LSDM-ja.
Sipas socialdemokratëve, Qeveria e Mickoskit, jo vetëm që nuk ka ndërmarrë masa serioze, por ka zvogëluar mjetet në Buxhetin 2025 për luftën kundër ndotjes së ajrit për 51%.
KAJA SHUKOVA – LSDM
“Shkupi, kryeqyteti i vendit, sërish është në listën e qyteteve më të ndotura në botë. Sipas raporteve të UNICEF-it, qytetarët e Shkupit, Tetovës, Kumanovës dhe Velesit thithin ajër të ndotur më shumë se 3 muaj. Banka Botërore alarmon se ndotja brenda vitit vret 2.800 bashkëqytetarë tanë. Këto të dhëna janë alarmante dhe kërkojnë aksion të domosdoshëm institucional që deri tani po mungon. Ku janë premtimet e Mickoskit dhe VMRO-DPMNE-së? Kur ishin në opozitë, paralajmëruan 1 miliardë euro investime për ajër të pastër dhe uljen e ndotjes për 50%. Këto premtime sot u dëshmuan si një gënjeshtër e madhe.”
Për shtatë vite, LSDM-ja nuk arriti që as 1% ta zvogëlojë ndotjen e ajrit – kundërpërgjigjen nga VMRO-DPMNE-ja.
VMRO – DPMNE
“Qeveria e udhëhequr nga VMRO-DPMNE përmes hapave konkret do ta luftojë ndotjen e ajrit. Disa nga masat janë; subvencione për klima-inverterë, mbështetje financiare për teknologji ekologjike, pyllëzimi dhe gazifikimi i përshpejtuar si dhe zgjidhje inovative për të ardhme të qëndrueshme.”
Ajri I ndotur sërish po ngulfat qytetet e Maqedonisë së Veriut, kurse Shkup, sipas platformës IQAir, u gjet në mesin e 10-të qyteteve më të ndotura në botë. Matjet kanë treguar indeksin 172, që paraqesin indikacione se qytetarët e Shkupit thithin ajër jo të pastër, me grimca të dëmshme PM 2.5. /tvklan.mk
Burimi: TV KLAN
