Lokomotiva Zagreb ka luajtur sot një miqësore luksi në përgatitjet për sezonin e ri, pasi përballë ka pasur skuadrën e Ajaksit, kampione e Holandës.
Ekipi kroat, në radhët e të cilit ishin 7 futbollistë shqiptarë të gatshëm për duelin e sotëm, është mundur me shifrat 3-0 nga gjigandët holandezë, të cilët dominuan sfidën.
Dy futbollistët e Kombëtares A, Jon Mersinaj dhe Enis Çokaj e nisën ndeshjen si titullarë, ndërsa në pjesën e dytë u aktivizua edhe Sherif Kallaku, i cili pat mundësinë që për disa minuta të luante kundër gjigandëve holandezë.
Ndërkohë, Art Smakaj i përfaqësueses U21 të Kosovës luajti gjithashtu në pjesën e dytë për skuadrën kroate.
Në stol ishin edhe Albion Marku, Indrit Tuci dhe Hajdin Salihu, të cilët nuk u aktivizuan në këtë miqësore ndaj skuadrës së njohur holandeze.
