Kryeministrja britanike Liz Truss ka shkarkuar ministrin e Tregtisë Conor Burns me efekt të menjëhershëm pas akuzave për sjellje të pahijshme nga ana e tij.
Deputeti konservator i Bournemouth West gjithashtu i është pezulluar statusi ndërkohë që ankesa ndaj tij po hetohet.
“Pas një ankese për sjellje të pahijshme serioze, kryeministrja i ka kërkuar deputetit Conor Burns të largohet nga qeveria me efekt të menjëhershëm”, thuhet në deklaratën e zëdhënësit.
“Ne i marrim seriozisht të gjitha këto akuza. Kryeministrja ka qenë e qartë se standardet më të larta në jetën publike duhet të respektohen”.
Vendimi i Truss vjen pas konferencës vjetore që u zhvillua në Birmingham nga e diela e kaluar deri të mërkurën.
Burns, ka thënë se do të bashkëpunojë plotësisht me hetimin dhe “mezi pret të pastrojë emrin e tij”.
Në një deklaratë në Twitter, ai tha se nuk i janë dhënë asnjë detaj rreth ankesës dhe as i është kërkuar të japë ndonjë informacion.
Ai ka qenë deputet që nga viti 2010 dhe ka mbajtur një sërë postesh ministrore nën drejtimin e qeverisë së Boris Johnson.
