Ligjvënësit evropianë kanë kërkuar një hetim ndaj kompanisë Meta, pas pezullimit masiv të llogarive që publikonin përmbajtje lidhur me protestat anti-qeveritare në Shqipëri. Më shumë se 30 anëtarë të Parlamentit Evropian i kanë dërguar një letër Komisionit Evropian, duke kërkuar të verifikohet nëse veprimet e Meta-s janë në përputhje me Ligjin për Shërbimet Digjitale të Bashkimit Evropian.

Ndërkohë, organizata jofitimprurëse “Repro Uncensored”, e cila monitoron censurën digjitale, pretendon se ka prova që tregojnë për një aktivitet të koordinuar. Themeluesja e kësaj organizate, Martha Dimitratou, deklaroi se janë verifikuar rreth 100 raste të kufizimit të llogarive, ndërsa vlerësoi se numri i vërtetë mund të jetë disa qindra.

Eurodeputetja Alexandra Geese e cilësoi situatën si një formë censure.

Një nga protestuesit, Arjan Koçi, i cili dokumentoi protestat në Tiranë përmes pamjeve me dron, tregoi se mori njoftime të shumta nga Meta për shkelje të të drejtave të autorit. Koçi deklaroi se personi që raportoi llogarinë e tij i kërkoi 1,800 dollarë në kriptomonedhë për të tërhequr ankesat.

Sipas tij, disa llogari të tjera u mbyllën në të njëjtën kohë gjatë natës.

Një zëdhënës i Meta-s deklaroi për WIRED se llogaritë u hoqën gabimisht dhe janë rikthyer, duke shtuar se kompania ka një proces apelimi për raste të tilla. Meta nuk komentoi mbi hetimin. Nga ana tjetër, kryeministri i Shqipërisë, Edi Rama, mohoi çdo përfshirje të qeverisë, duke deklaruar në platformën X se qeveria nuk ka asnjë lidhje me kufizimet e llogarive dhe as aftësi teknike për të kryer operacione të tilla.

Zëdhënësi i Komisionit Evropian, Thomas Regnier, konfirmoi se komisioni po heton Meta-n për shqetësimet lidhur me kufizimin e zërave politikë, të njohur si “shadow banning”. Regnier shtoi se pretendimet e fundit nuk janë të papritura. Ndërsa llogaria e Koçit është rikthyer, ai shprehu dyshimin se vazhdon të jetë subjekt i kufizimeve të dukshmërisë. Burimi i sulmeve mbetet i paqartë.

Burimi: botasot.info