Atalanta pëson humbjen e parë në Serinë A këtë sezon pikërisht përballë Lazios, që e parakalon në renditje (falë golaverazhit më të mirë, pasi të dyja skuadrat kanë nga 24 pikë) duke e zhvendosur në vendin e katërt ekipin e drejtuar nga Gasperini.
Një sfidë e nisur dhe e përfunduar keq nga zikaltrit nga Bergamo, që minutat shtesë i luajtën në inferioritet numerik, pas ndëshkimit të Muriel me kartonin e dytë të verdhë.
Zaccagni e zhbllokoi takimin në favor të lazialëve që në minutën e 10-të, pasi u shërbye nga Pedro.
Një aksion i gjatë dhe model i ekipit kryeqytetas, që e gjeti të pavendosur mirë Atalantën në qendër të mbrojtjes, ku Gjimshiti u aktivizua vetëm në pjesën e dytë, pas një mungese disamujore për arsye dëmtimi.
Golin e dytë Lazio e gjeti në minutën e 52-të, pas një kundërsulmi të shpejtë që u finalizua me golin e Felipe Andersonit, i shërbyer nga Marusic. Në minutën e 77-të, Sarri vendosi të aktivizonte Elseid Hysajn, i cili mori vendin e Lazzarit në krahun e djathtë të mbrojtjes.
