Laura Pausini është në formë të shkëlqyer, si artistikisht ashtu edhe personalisht. Pasi ka fryrë 50 qirinjtë mbi tortë (një moment i rëndësishëm dhe domethënës për këdo), ajo e ka festuar këtë arritje me një festë të madhe në Milano, në praninë e familjes dhe miqve. Ky moment shënon edhe fillimin e një epoke të re për të, të quajtur “Blonde Age” (Epoka e Biondes), me një pamje të re platin që, edhe pse zgjati vetëm për promovimin e një kënge të re, i habiti ata që gjithmonë e kishin njohur si brune.
Së bashku me 50-vjetorin e saj, Pausini feston edhe 30 vite karrierë: aq kohë ka kaluar që kur debutoi në skenën e Festivalit të Sanremos me këngën për Markon që ishte larguar dhe nuk kthehej më. Laura Pausini, këngëtarja që ka thyer çdo rekord italian duke menduar dhe vepruar në mënyrë globale, të dielën, më 1 dhjetor, pasdite, do të tregojë këtë udhëtim në programin “Verissimo” të Silvia Toffanin, ku do të shpallë një dhuratë të madhe për fansat e saj.
Ajo që do të prezantohet gjatë intervistës në Canale 5 është “Laura 30 World Tour”, një dokumentar-koncert që do të jetë i disponueshëm nga 2 dhjetori, ora 19:00, në Mediaset Infinity. Ky dokumentar rrëfen, përmes zërit të këngëtares, karrierën e saj të jashtëzakonshme mbi skenat e botës, që nga debutimi deri te “Laura Pausini World Tour 2023/2024”, një turne që e ka çuar në 70 qytete në Itali, Evropë, Amerikën Latine dhe Shtetet e Bashkuara, duke korrur sukses të madh.
Ky dokumentar-koncert vjen pas festimit madhështor të vitit të kaluar, me eventin e pabesueshëm “Laura30, 30 Years In 24 Hours”, ku këngëtarja performoi në tre koncerte falas brenda 24 orëve: më 26 shkurt në ora 18:00 në New York, më 27 shkurt në ora 15:00 në Madrid dhe po atë ditë në ora 23:00 në Milano.
30 vitet e një karriere të ndritur do të jenë padyshim në qendër të intervistës së Laura Pausini në “Verissimo”, por do të ketë hapësirë edhe për të rrëfyer për jetën e saj private dhe familjen e lumtur që ka ndërtuar me bashkëshortin e saj, Paolo Carta. Çifti u martua vetëm vitin e kaluar, pas 18 vitesh bashkë. Laura ka një marrëdhënie të shkëlqyer me tre fëmijët e bashkëshortit nga një marrëdhënie e mëparshme, si dhe me vajzën e tyre të përbashkët, Paola, një vajzë 11-vjeçare që, pas një jete të kaluar duke udhëtuar nga një vend në tjetrin, mbetet për Laura “vendi më i bukur në hartën e botës”. Paola, sipas të gjitha gjasave, duket se dëshiron të ndjekë gjurmët e familjes.
Burimi: botasot.info
