Shumica parlamentare është stabile, ndërsa Qeveria është tërësisht e fokusuar në menaxhimin e krizës, deklaroi sot zëdhënësja e LSDM-së, Bogdanka Kuzeska për MIA-n.
“Ato janë punë të brendshme partiake, deklaroi dje kryetari i partisë, unë nuk do ta komentoja. Shumica parlamentare është stabile, ndërsa Qeveria është tërësisht e fokusuar në menaxhimin e krizës ekonomike dhe energjetike, si dhe në procesin e skriningut i cili tani më është duke vijuar”, thotë Kuzeska, duke e përsëritur qëndrimin e partisë pas informacioneve për ngjarjet në partnerin e tyre të koalicionit BDI.
Paraprakisht sot për informacionet lidhur me BDI-në, në konferencë për shtyp u përgjigj në pyetje të gazetarëve edhe ministri i Punëve të Jashtme Bujar Osmani duke potencuar se lajm i rremë është informacioni për ndërrimin e tij dhe se nuk meriton asnjë koment.
lidhur me letrën e hapur të një grupi të anëtarëve të BDI-së, Osmani tha se në parti ka nivel të lartë të demokracisë dhe secili mund ta shprehë mendimin e tij, por se fjalën e fundit e ka lideri Ali Ahmeti.
“Me deklaratën e djeshme të Ahmetit, mendoj se këtu ka përfunduar ajo histori”, deklaroi Osmani, duke u përgjigjur në pyetje të gazetarëve në konferencën e sotme në MPJ.
I pyetur për atë nëse trazirat brenda partiake do të ndikojnë në stabilitetin e Qeverisë, Osmani tha se BDI-ja është faktor i stabilitetit në 20 vite dhe se ashtu edhe do të vazhdojë.
“BDI-ja është strukturë politike stabile, nuk presim kurrfarë zhvillim të mëtutjeshëm të ngjarjeve”, shtoi Osmani.
Njëzet anëtarë të pakënaqur të BDI-së, ndër të cilët Musa Xhaferi, Izet Mexhiti, Nevzat Beita, Blerim Bexheti dhe Visar Ganiu, në një letër të hapur kërkuan debat brenda partiak që të tejkalohet situata dhe i bënë thirrje liderit të partisë Ahmeti ta përdorë autoritetin e tij politik dhe statutor që të gjindet zgjidhje për ruajtjen e unitetit partiak. Për situatën në parti ata e akuzojnë Artan Grubin.
Marketing
