Nga Alternativa kanë reaguar pas djegies së arkivit në Gjykatën Themelore të Kumanovës, përcjell TV21. Nga kjo parti thonë se kanë dilema dhe dyshime se kjo gjë është bërë me qëllim.
“Edhe një goditje për besueshmërinë e gjyqësorit në Kumanovë dhe në Maqedoninë e Veriut. Është interesante se në çdo 2-3 vite na digjen gjykatat, rastësisht këto djegie ndodhin në hapësirat ku mbahen arkivat dhe në asnjërin rast deri më tani nuk është gjetur fajtori. Jo rastësisht edhe në sondazhet e besueshmërisë së institucioneve Gjyqësori është e fundit për nga besimi. Kujt po i pastrohet lëkura? Dhe kush është aq i fuqishëm që ta ndezë zjarrin dhe ta fsheh tymin? Siç duket as me këta udhëheqës të këtij institucioni nuk ka ndryshim të traditës së krimit dhe korrupsionit. Agjenda e bllokut “Pro Evropian” po fillon t`i jap shenjat e para. Populli thotë:” Ujku qimen e ndërron, po zanatin nuk e harron”. Zhvillime të rëndësishme e jo të rastësishme. Shpresë e humbur e qytetarëve. Guxim i tkurrur në maksimum dhe gjithçka qetë, sikur të mos kishte ndodhur asgjë”, tha Orhan Kurtishi, kryetar i Degës së Alternativës në Kumanovë.
Burimi: TV21
