Komisioni Shtetërorë i Zgjedhjeve ka nisur procedurat për zbatimin e zgjedhjeve lokale në Mavrovë Rostushë dhe Qendër Zhupë të cilat do të mbahen më 17 prill të këtij viti.
Anëtarët e komisionit kanë miratuar vendimin për formimin e trupave për asistencë të KSHZ-së të cilat i referohen trajtimit të materialit zgjedhor, atij konfidencial dhe jokonfidencial, transportit, ruajtjes së aparateve për gjurmët e gishtave dhe të dhënave në të.
“KSHZ-ja ka filluar me përgatitjen e të gjitha akteve të nevojshme dhe veprimeve tjera përgatitore si për të gjitha zgjedhjet në pajtim me Kodin Zgjedhor dhe procedurat e caktuara tashmë kanë filluar. Të dielën fillon mbledhja e nënshkrimeve për kandidimin e kandidatëve. Të premten fillon inspektimi publik i listës zgjedhore dhe të gjitha veprimet sipas planit të publikuar në ueb faqen e KShZ-së i cili është në dispozicion të të gjithë pjesëmarrësve të interesuar, partive kandidatëve dhe medieve.”,- u shpreh anëtari i KShZ-së, Boris Kondarko.
Ndërkohë kreu i KShZ-së premtoi se të gjithë anëtarët e këshillave zgjedhor të angazhuar në zgjedhjet lokale të katër muajve më parë do të paguhen për angazhimin e tyre. 12 komuna të cilat në momentin e shpalljes së zgjedhjeve lokale kanë pasur xhirollogari të bllokuar, mjetet do t’i sigurojë Ministria e Financave.
“Atje ku janë të bllokuara llogaritë para fillimit të zgjedhjeve dërguam kërkesë dhe listë deri te Ministria e Financave kështu që procedura është nga fundi dhe Ministria e Financave do të dërgojë mjete posaçërisht për këtë qëllim dhe do të paguhen.”,- tha kryetari i KShZ-së, Aleksandar Dashtevski.
Bëhet fjalë për komunat: Zërnovc, Resnjë, Dellçevë, Ohër, Pehçevë, Tetovë, Strugë, Krivogashtan, Karposh, Demir Kapi, Vasilevë dhe Çeshinovë- Obleshevë. Nga Komisioni Shtetëror i Zgjedhjeve konfirmojnë se procedura për to është nga fundi.
