Distancohet nga Taravari kryetarja e Forumit të Grave të ASh-së: Nuk hesht përpara përqafimit me BDI-në
Teuta Xhaferi, kryetare e Forumit të Gruas të degës Çair nga radhët e Aleancës për Shqiptarët, ka shpallur publikisht distancimin e saj nga udhëheqësia aktuale e partisë nën drejtimin e Arben Taravarit. Në një deklaratë të fortë në rrjetet sociale, Xhaferi ka sqaruar se ka bojkotuar hapjen e selisë së re të partisë në Çair, si një akt ndërgjegjeje dhe mospajtimi me kahjen politike që ka marrë Aleanca.
“Aleanca që ndërtuam me qindra aktivistë në Çair, sot nuk ekziston më. Po ecim drejt një përqafimi të rrezikshëm me partinë që kemi luftuar ta çojmë në opozitë — BDI-në,” ka shkruar ajo, duke e cilësuar këtë si një devijim të rëndë nga vlerat dhe vizioni i dikurshëm i formacionit politik.
Xhaferi ka kritikuar hapur drejtuesit e rinj të partisë në Çair, duke kujtuar se “ai që dikur lutej për t’u afruar, sot ndan ultimatume”. Ajo ka theksuar se nuk largohet për inat, por për bindje, dhe se qëndrimi i saj politik do të mbetet i lidhur ngushtë me qytetarët e Çairit dhe idealin e një Aleance që nuk shitet për interesa personale.
“Politika ime lokalizohet aty ku më është dhënë besimi, në Çair. Me qytetarët, me gratë e këtij komuniteti, me të rinjtë që ende besojnë,” ka përfunduar ajo.
Deklarata vjen në një kohë të tensionuar për Aleancën për Shqiptarët, me rritje të pakënaqësive të brendshme pas largimit nga koalicioni opozitar VLEN dhe afrimit të saj me BDI-në.
