Kryeministrja e Italisë Giorgia Meloni shprehu keqardhje pasi katër turistë italianë në qytetin e Beratit në Shqipëri u larguan nga një restorant pa paguar ushqimet e tyre, duke theksuar se çështja tashmë është rregulluar, transmeton Anadolu.
Ndërsa ishte me pushime në Shqipëri, kryeministri shqiptar Edi Rama i ka treguar asaj për katër turistë italianë që kanë ikur pas ngrënies në një restorant lokal pa paguar, tha ajo në rrjetin social “X”, të njohur më parë si Twitter, duke shtuar se është ndier e turpëruar kur ka dëgjuar për incidentin.
“U ndjeva e turpëruar sepse Italia që dua të përfaqësoj nuk është një komb për të cilin flitet gjetiu për këto gjëra, që nuk respekton punën e të tjerëve, që mendon se është argëtuese të mashtrosh të tjerët”, shtoi ajo.
“Kështu që vendosa t’i kërkoj ambasadorit që të shkojë të paguajë shumën, të cilën e kam paguar nga xhepi im”, ka shpjeguar Meloni.
Në një reagim të ngjashëm, Ambasada e Italisë në Shqipëri lëshoi një deklaratë ku thoshte: “Italianët respektojnë rregullat dhe paguajnë borxhet e tyre dhe shpresojmë që episode të tilla të mos përsëriten”.
Meloni dhe familja e saj kaluan disa ditë në Shqipëri këtë javë si të ftuar të kryeministrit Rama.
Ndërsa lajmet për largimin e disa italianëve nga një restorant në Berat u shpërndanë në mediat shqiptare, Edi Rama i tha të përditshmes italiane “La Stampa” në një intervistë të premten se Meloni ndërhyri për të zgjidhur çështjen.
“Shkoni dhe paguani çekun për këta idiotë, ju lutem”, ka cituar Rama Melonin t’i ketë thënë ambasadorit italian në Shqipëri.
