Producenti televiziv Chuck Lorre – i cili krijoi “The Big Bang Theory” – ka paraqitur kërkesën për divorc nga gruaja e tij e tretë, Arielle Lorre.
Lorre, i cili gjithashtu krijoi “Two And A Half Men”, vendosi të ndahej nga Arielle pas tre vitesh martesë, raporton TMZ.
Çifti u martua në tetor të vitit 2018. Sipas dokumenteve gjyqësore të siguruara nga TMZ, Lorre pretendon se dyshja vendosën të ndaheshin në maj. Ai përmendi mospajtimet si arsye për divorcin.
Dyshja konfirmuan ndarjen e tyre në një deklaratë për Variety , “Është me konsideratë dhe respekt të ndërsjellë që ne kemi vendosur të ndahemi. Plani ynë është të ecim përpara në drejtime të ndryshme, por me dashuri, admirim dhe mirënjohje të madhe për kohën që ndamë. Ju kërkojmë që të respektoni privatësinë tonë gjatë kësaj kohe të vështirë. Faleminderit për mbështetjen tuaj.”
Dyshja kishin nënshkruar një marrëveshje paramartesore përpara dasmës së tyre, shton media. Edhe pse dyshja nuk patën fëmijë së bashku gjatë romancës së tyre trevjeçare, Lorre ka dy fëmijë të rritur nga martesa e tij e parë me Paula Smith.
Marrëveshja, sipas dokumenteve të marra nga media, tregon se ai do të paguajë mbështetjen bashkëshortore si dhe tarifat e avokatit.
Arielle njihet më së shumti për markën e saj të stilit të jetesës në mediat sociale e cila fokusohet në shëndetin dhe mirëqenien. Ajo është gjithashtu prezantuese e podcast-it “The Blonde Files” dhe ka popullaritet të madh në rrjetet sociale me më shumë se 280,000 ndjekës në Instagram.
Fituesi i çmimit Emmy Lorre konsiderohet si një nga producentët më të suksesshëm televiziv në Hollywood. Përveç “The Big Bang Theory” dhe “Two And A Half Men”, meritat e Lorre përfshijnë “Dharma & Greg”, “Cybill”, “Mom” dhe “Mike dhe Molly” të ABC.
