Kreu i GJKKO: Media, partner i rëndësishëm në forcimin e transparencës dhe besimit publik!

Në përurimin e ambienteve të reja të GJKKO, kryetari në detyrë i këtij institucioni, Erion Bani deklaroi se media është partner i rëndësishëm në forcimin e transparencës dhe besimit publik.

Ai tha se një gjykatë më e sigurt është një gjykatë më e pavarur dhe më funksionale.

Bani deklaroi se pasuritë e sekuestruara, që janë krijuar në mënyrë të paligjshme, përdoren për qëllime të dobishme publike, ndërsa theksoi se në këtë rast qytetarit marrin dy mesazhe: E para shteti është i aftë të godasë përfitimin e paligjshëm dhe së dyti shteti është i aftë ta kthejë atë vlerë në shërbim për shoqërinë.

“Sallat e gjykimit janë zemra e gjykatës dhe duhet të garantojnë solemnitet, barazi dhe dinjitet. Transparenca nuk është detyrim formal, por pjesë e kulturës institucionale të gjykatës. Media është partner i rëndësishëm në forcimin e transparencës dhe besimit publik. Siguria dhe dinjiteti në procesin gjyqësor nuk përjashtojnë njëra-tjetrën, por bashkëjetojnë. Një gjykatë më e sigurt është një gjykatë më e pavarur dhe më funksionale. Pasuria e krijuar në mënyrë të paligjshme nuk mbetet në duart e krimit, por i kthehet shoqërisë në shërbim publik. Ky investim tregon se shteti i së drejtës di ta kthejë paligjshmërinë në vlerë publike. Ky transformim është fillimi i një standardi të ri, jo fundi i një projekti. Drejtësia matet me mënyrën se si qytetari pritet, dëgjohet dhe trajtohet.”, tha ai.