Presidenti rus Vladimir Putin nuk do t’u dërgojë urime me rastin e Vitit të Ri liderëve të “vendeve jomiqësore”, tha sot Kremlini, transmeton Anadolu Agency (AA).
Urime nuk do t’u dërgohen presidentit të SHBA-së Joe Biden, kancelarit gjerman Olaf Scholz dhe presidentit francez Emmanuel Macron, sipas zëdhënësit të Kremlinit, Dmitry Peskov.
Ai tha se Rusia “praktikisht nuk ka asnjë kontakt” me këta njerëz.
I pyetur pse Putini anuloi konferencën e tij tradicionale për media të fundvitit, Peskov tha se angazhimet e shtypit të presidentit rus në të ardhmen e afërt nuk do të jenë të njëjta si para pandemisë.
Kjo për shkak se shëndeti i presidentit është “një çështje e sigurisë së shtetit”, tha ai.
“Në vitin 2023, viti i fundit para zgjedhjeve presidenciale të Rusisë 2024, Putin planifikon të fokusohet në çështjet të cilat duhet të përfundojnë me efikasitet 100 për qind”, tha Peskov.
Lidhur me rënien e raketës ukrainase në Bjellorusi, ai tha se Rusia e konsideron incidentin “jashtëzakonisht shqetësues”, duke shtuar se Moska është në kontakt të vazhdueshëm me Minskun.
Në lidhje me integrimin e katër rajoneve të Ukrainës të aneksuara këtë vit, Peskov tha se ky proces po vazhdon me shpejtësi.
