Kremlini pranoi sot se ushtria ruse ka probleme me pajisjet e saj, për të cilat së fundi u aludua edhe nga presidenti rus Vladimir Putin.
“Të gjithë dëgjuat se çfarë tha presidenti në mbledhjen e Këshillit Koordinues. Ka pasur vërtet probleme me pajisjet,” tha sot zëdhënësi i Kremlinit Dmitri Peskov.
Sipas tij, disa nga problemet ende ekzistojnë, por ato janë duke u zgjidhur.
“Po merren masa për eliminimin e këtyre problemeve”, tha Peskov
Putin tha dje se “pajisjet e ushtarëve rusë duhet të jenë moderne dhe efikase” në mënyrë që të plotësohen kërkesat e “operacionit special ushtarak” të Rusisë në Ukrainë.
Ai i kërkoi gjithashtu qeverisë ruse të “përshpejtojë vendimmarrjen” për prodhimin e pajisjeve ushtarake.
