Kryetari i Partisë Demokratike të Kosovës, Memli Krasniqi në vazhdën e vizitave të tij nëpër komunat e Kosovës, sot ka vizituar Hanin e Elezit, ku u takua me kryetarin Mehmet Ballazhi.
Krasniqi tha se kryetari Ballazhi dhe stafi i tij i drejtorëve është shembull i mirë i barazisë gjinore, por edhe profesionalizmit dhe përkushtimit për të punuar për qytetarët.
Pas vizitës në komunë, Krasniqi dhe Ballazhi kanë parë nga afër Qendrën e re të Kulturës, një projekt i nisur vite më parë kur PDK e udhëhiqte Ministrinë e Kulturës, e që ka përfunduar tani kur këtë komunë e udhëheq kryetari nga radhët e PDK-së.
“Kam thënë çdo herë që Hani i Elezit nuk duhet të jetë më vetëm një vendkalim. Ai duhet të kthehet në vendqëndrim që u jep perspektivë e mundësi qytetarëve të tij. Nga diskutimet me kryetarin, por edhe nga vizitat në terren, u ndava i kënaqur, pasi premtimet e dhëna në fushatë po realizohen për një periudhë të shkurtër gjashtëmujore nga marrja e detyrës. Një nga këta shembuj është pikërisht Qendra e Kulturës që sot më vjen mirë që u iniciua nga një ministër nga radhët e PDK-së para pak vitesh, e po përfundon kur një kryetar komune nga radhët e PDK-së është duke e udhëhequr qytetin dhe ky objekt iu ofron qytetarëve atë që u ka munguar – një Shtëpi për Kulturën, Rininë dhe Sportin”, tha Krasniqi.
Krasniqi dhe Ballazhi kanë vizituar edhe punimet në përfundimin e projektit për Fabrikën e Ujit të Pijshëm dhe vendkalimet përgjatë hekurudhës që do të rregullohen për ta ndryshuar për të mirë situatën tek familjet dhe qytetarët e Hanit të Elezit.
Kryetari Ballazhi me këtë rast u zotua se do të punojë për qytetarët dhe me qytetarët, pa dallim.
“Siç kemi premtuar gjatë fushatës, ne po punojmë në zbatimin e projekteve kapitale për krijimin e mundësive për qytetarët e Hanit të Elezit, që komuna jonë të bëhet vendqëndrim për ta. Shpresoj të arrijmë aty ku duhet bashkë me qytetarët dhe të krijojmë një jetë më të mirë”, tha Ballazhi.
