Kryetari i Qeverisë së Republikës së Maqedonisë së Veriut, Dimitar Kovaçevski, sot së bashku me ministrin e Ekonomisë, Kreshnik Bekteshi dhe drejtorin e Inspektoratit Shtetëror të Tregut, Goran Trajkovski, kanë vizituar një nga marketet në Shkup.
Qëllimi i vizitës është kontrollimi i gjendjes aktuale me furnizimin dhe çmimet e produkteve ushqimore bazë, përfshirë vezët e pulës dhe orizin, për të cilat Qeveria e Republikës së Maqedonisë së Veriut ka marrë vendim për ngrirjen e çmimeve, si dhe kontrollimin e furnizimit dhe çmimin e miellit.
“Më vjen mirë që sot u sigurova që vendimet tona të respektohen, gjë që shpresoj të jetë edhe në marketet e tjera”. Kjo masë do të qëndrojë në fuqi deri në fund të prillit 2023, me tendencë për miratimin e masave të ngjashme edhe për produktet e tjera ushqimore, nëse lind nevoja, sipas analizave të bëra më parë siç po bëjmë aktualisht.
U befasova shumë kur pashë se çmimi me pakicë i miellit është ulur edhe në një pjesë të marketeve, pa marrë një vendim zyrtar nga shteti dhe është bërë në bazë të bisedave që kemi pasur me prodhuesit e miellit, si dhe në bazë të uljes së një pjese të shpenzimeve që kanë në shpenzimet e prodhimit të tyre.
E mirëpresim një veprim të tillë dhe inkurajojmë mediat e tjera që të ndjekin këtë shembull”, tha Kryeministri Kovacevski gjatë vizitës së tij në market.
Ai theksoi se Qeveria e Republikës së Maqedonisë së Veriut merr vendime që mbrojnë buxhetin familjar.
“Dua ta siguroj opinionin maqedonas se prania jonë këtu nuk është e rastësishme. Qeveria dhe unë si personi i parë i Qeverisë, udhëheqim një politikë praktike, gjithëpërfshirëse. Ne marrim vendime që prekin qytetarët dhe prandaj dëshirojmë që personalisht në terren të dëgjojmë zërin e qytetarit, zërin e popullit, si reagim ndaj politikave që zbatojmë dhe vendimeve që marrim”, tha Kryeministri, i cili paralajmëroi ulje të mundshme të çmimeve të pemëve dhe perimeve.
Kryeministri thekson se në ndihmë të qytetarëve janë duke u marrë masat për ngrirjen e çmimit të vezëve të pulës, por edhe të orizit, e para kësaj të produkteve të qumështit, makaronave dhe bukës.
“Për mua është shumë e qartë dhe e kam thënë në të gjitha rastet nga shtatori e deri më sot, se shpenzimi i jetesës është rritur si rezultat i luftës që po zhvillohet në Ukrainë dhe për këtë arsye Qeveria ka miratuar një sërë masash nga rritja e pagës minimale, rritja e pensioneve, rritja e ndihmës financiare për kategoritë më të cenushme të qytetarëve.
Sollëm masa kundër krizës prej 760 milionë euro, të cilat ishin të destinuara ekskluzivisht për kategoritë më të cenueshme të qytetarëve dhe për ruajtjen e likuiditetit të kompanive”, tha Kryeministri Kovaçevski, duke shtuar se sipas parametrave, që nga tetori deri më tani, inflacioni ka ardhur duke u ulur në bazë mujore.
Kryeministri sqaroi se masat synojnë mbrojtjen e tregut të brendshëm dhe kërkoi mirëkuptim nga kompanitë.
“Kërkoj mirëkuptim nga përfaqësuesit e kompanive, nga biznesmenët, nga tregtarët. Qeveria e Republikës së Maqedonisë së Veriut ndihmoi gjatë gjithë viteve të krizës pasi filloi pandemia dhe më pas vazhdoi kriza energjetike, kriza ekonomike, e shkaktuar nga lufta në Ukrainë dhe askush nuk mbeti i vetëm të përballej me krizën.
Ju të gjithë i mbani mend masat që kishim për të mbështetur pagat në industri kur objektet industriale nuk punonin për shkak të krizës shkaktuar nga Korona. Qeveria siguronte pagat, Qeveria siguronte kredi të lira përmes Bankës për Zhvillim për të ruajtur likuiditetin. Tani është koha që të gjitha kompanitë së bashku me Qeverinë t’u kthehen qytetarëve, të cilët janë ata që ndërtojnë kompanitë tona maqedonase me blerjen e tyre.
Zgjatëm dorën atëherë për të mundësuar stabilitetin e bizneseve dhe tani kërkojmë nga ata të na e zgjasin dorën”, theksoi Kryeministri.
Ministri i Ekonomisë, Kreshnik Bekteshi ka paralajmëruar mundësinë e uljes së mëtejshme të çmimeve të produkteve.
“Me shumë gjasa nesër, në mbledhjen e Qeverisë do të merret vendimi për ngrirjen e çmimeve të produkteve higjienike dhe gjatë kësaj jave do të ngrihen edhe çmimet e disa pemëve dhe perimeve. Nuk do të presim punë të papërshtatshme të komisioneve të caktuara në Kuvend.
Me vendim të Qeverisë do të ulim çmimet e një sërë produktesh higjienike njësoj si bëmë me çmimet e produkteve ushqimore deri në një datë të caktuar, por data se deri kur do të zgjasë ngrirja do të dihet nesër “, theksoi ministri i Ekonomisë, Bekteshi.
Ai shtoi se janë duke u bërë analiza për çmimet e importit të tregtarëve dhe sipas të dhënave do të vendoset për ngrirje të mëtejshme të çmimeve.
Drejtori i Inspektoratit Shtetëror të Tregut, Goran Trajkovski, tha se të gjithë inspektorët janë në terren dhe se disa nga personat juridikë janë shpallur fajtorë për kundërvajtje, për të cilat janë duke u zhvilluar procedura. Ai u ka bërë apel tregtarëve që nëse kanë mundësi të ulin çmimet edhe për produktet tjera.
“Inspektorët janë në terren dhe ne po veprojmë me kapacitet të plotë. Në 5 ditët e kaluara janë kryer mbi 500 kontrolle, prej të cilave 130 janë bazuar në vendime të Qeverisë, për të cilat janë lëshuar urdhërpagesa në vlerë prej mbi 750.000 denarë.
Nuk do të veprojmë në mënyrë selektive dhe kushdo që ka shkelur ligjin do të përgjigjet sipas veprës penale”, tha drejtori Trajkovski.
