Samiti i Procesit të Berlinit ka rëndësi të madhe për vendet e Ballkanit Perëndimor, sepse liderët e gjashtë vendeve të rajonit do të kthehen me tre marrëveshje të cilat do të kenë ndikim të madh jo vetëm për avancimin e vendeve, por edhe për bashkëpunimin rajonal. Kancelari gjerman, Olaf Sholc, në hapjen e Samitit në Berlin, tha se ardhmëria e përbashkët pa kufij është kyçe për Ballkanin Perëndimor dhe shtoi se ky proces jo vetëm se do ta çlirojë potencialin e rajonit, por do ta përshpejtojë edhe rrugën e këtyre shteteve drejt BE-së.
“Sot, ju liderët e tre vendeve të Ballkanit Perëndimor po bëni tre hapa shumë të mëdhenj duke nënshkruar këto tre marrëveshje të rëndësishme, marrëveshje këto të cilat do të kontribuojnë që jeta e njerëzve të jetë shumë më e lehtë. Tregu i përbashkët rajonal do ta rrisë ekonominë dhe investimet në rajon. Marrëveshjet do t’u mundësojnë qytetarëve t’i kalojnë kufijtë e tyre vetëm me letërnjoftim. Do të sigurohen se studentët e Sarajevës do t’i përfundojnë studimet e tyre në Beograd ose inxhinierët nga Tirana do ta shfrytëzojnë diplomën e tyre për të marrë ofertë pune në Shkup”, deklaroi Olaf Sholc, kancelar gjerman.
Kryetarja e Komisionit Europian, Ursula von der Lajen, e cila po ashtu mori pjesë në Samit, në profilin e saj në Tuiter shkroi se ndihet e lumtur që i sheh bashkë liderët e Ballkanit Perëndimor dhe se është koha e duhur për ta thelluar integrimin ekonomik të rajonit.
“Më vjen mirë t’i shoh të gjithë partnerët e Ballkanit Perëndimor në Berlin, një javë pas vizitës sime në rajon. Ne jemi këtu për ta thelluar integrimin tonë ekonomik, duke filluar me energji. Pakoja jonë për mbështetje energjetike prej 1 miliard eurove për Ballkanin Perëndimor do të na ndihmojë të ndërtojmë të ardhmen tonë të përbashkët energjetike”, pohoi Ursula Von Der Lajen, Kryetare e Komisionit Europian.
Kryeministri Dimitar Kovaçevski, gjatë fjalimit të tij në Sesionin për Bashkëpunim Rajonal dhe Tregje të Përbashkëta Rajonale, vlerësoi se Procesi i Berlinit është historik, sepse vjen në kohë të krizës së vazhduar dhe në moment kur duhet të ketë bashkëpunim të përforcuar mes vendeve të Ballkanit Perëndimor.
