Kryeministri Dimitar Kovaçevski për gazetën ditore austriake “Di Prese”, porositi se në kohë të agresionit ushtarak të Rusisë drejt Ukrainës, anëtarësimi në NATO është me rëndësi të madhe për Republikën e Maqedonisë së Veriut, veçanërisht për ekonominë e saj.
“Sulmi i paprovokuar i Rusisë ndaj Ukrainës, dëshmon se anëtarësimi në NATO, aleancën më të madhe të mbrojtjes në botë, është e një rëndësie të madhe për çdo anëtar. Ne jemi një vend i vogël. Siguria jonë garantohet nga të gjithë anëtarët e NATO-s, gjë që ka shumë pasoja pozitive për shoqërinë tonë, si dhe për ekonominë tonë. Sepse investitorët e huaj, veçanërisht ata në sektorin e infrastrukturës, e dinë se janë në një vend të sigurt, të mbrojtur nga NATO”, theksoi Kovaçevski për “Di Prese”.
Kovaçevski, siç informojnë nga shërbimi për shtyp i Qeverisë, iu referua edhe gazetës austriake për interesin e vazhdueshëm gjeostrategjik të Rusisë në Ballkan.
“Ballkani Perëndimor ka qenë gjithmonë në interes të Rusisë. Ndikimi i saj përmes mediave, duke përfshirë edhe disa parti politike, ka qenë gjithmonë i pranishëm. Rusia ka interes për konfliktet e ngrira në Ballkan, të cilat i pengojnë vendet të ndjekin rrugën e tyre drejt integrimit euroatlantik”, shtoi ai.
