Kryetari i Komunës së Butelit, Darko Kostovski, ka njoftuar fillimin e punimeve ndërtimore në rrugën “Marko Krale”, një nga arteriet kryesore të komunikacionit në lagjen Butel.
“Edhe një kërkesë e qytetarëve po realizohet”, ka theksuar Kostovski, duke njoftuar se punimet janë pjesë e ofensivës ndërtimore për përmirësimin e infrastrukturës rrugore në komunë.
Sipas njoftimit të tij, rruga “Marko Krale” ka një sipërfaqe prej 6.120 metrash katrorë dhe gjatësi prej 1.100 metrash.
Kostovski ka rikujtuar se më herët janë rikonstruktuar edhe rrugët “Ho Shi Min” dhe “Natanail Kuçevishki”, duke e paraqitur projektin e ri si një hap tjetër në përmirësimin e rrjetit rrugor të Butelit.
“Qytetarët janë ata që na dhanë besimin dhe unë punoj në interes të tyre”, ka shkruar kryetari i Butelit, duke shtuar se punimet përfaqësojnë një tjetër realizim të premtimeve të dhëna ndaj qytetarëve.
