Çdo nxënës që këtë vit nis klasën e parë në shkollat fillore komunale të Butelit do të marrë falas çantë anatomike me pajisje shkollore, si dhe uniformë shkollore.
Lajmin e ka bërë të ditur kryetari i Komunës së Butelit, Darko Kostovski, i cili njoftoi se masa do të realizohet më 1 shtator, me qëllim që nxënësit më të vegjël ta nisin vitin e ri shkollor me kushtet e nevojshme, ndërsa familjeve t’u lehtësohen shpenzimet.
Paketa shkollore do të përfshijë çantë anatomike të cilësisë së lartë, mjet për numrat, bllok, ngjyra druri, flomasterë, plastelinë, lapsa, fletore, mprehëse dhe gomë.
Sipas Komunës së Butelit, vlera e paketës shkollore dhe uniformës përfaqëson një kursim prej rreth 9.000 denarësh për çdo familje që këtë vit ka fëmijë që nis klasën e parë.
Nga Komuna theksojnë se kjo masë synon të mbështesë familjet dhe të krijojë kushte më të mira për fillimin e arsimit për nxënësit më të vegjël.
“Investimi tek fëmijët është investim në të ardhmen e Komunës së Butelit”, thuhet në njoftimin e kryetarit Kostovski.
