Në përkujtim të ngjarjes më të rëndë të ndodhur në Komunën e Malishevës, më 31 mars 1999, sot u mbajt një mbledhje përkujtimore.
Gjatë këtij takimi, kryetari i Komunës së Malishevës, Ekrem Kastrati, së bashku me folës të tjerë, kërkoi edhe një herë që autorët dhe urdhërdhënësit e këtij krimi makabër të sillen para drejtësisë dhe të marrin dënimin e merituar.
Në këtë ngjarje përkujtimore morën pjesë kryetari i komunës së Malishevës, Ekrem Kastrati, nënkryetari Vesel Krasniqi, kryesuesi i Kuvendit Komunal, Argjend Thaçi, asamblistë, komandanti i stacionit policor në Malishevë, Nazmi Zogaj, kryetari i Bashkësisë Islame në Malishevë, Sead Paçarizi, përfaqësues të OVL të UÇK-së, Metush Kryeziu, përfaqësuesi i shoqatës për personat e zhdukur, Hysen Kryeziu, familjarë dhe qytetarë të tjerë.
Në fjalën e tij, Kastrati, duke përkujtuar 42 të vrarët në “Masakrën e Burimit”, e cilësoi këtë ngjarje si më të rëndën në historinë e Malishevës, duke e konsideruar një akt hakmarrjeje të okupatorit serb ndaj luftës së UÇK-së.
“Kjo ngjarje është dëshmia më e qartë e gjenocidit dhe terrorit të organizuar. Është një krim për të cilin ende nuk është dënuar askush. Ne kërkojmë që autorët dhe urdhërdhënësit e këtij krimi makabër të sillen sa më shpejt para drejtësisë dhe të marrin dënimin e merituar. Fatkeqësisht, jo vetëm që nuk janë dënuar, por ndodh e kundërta – sot po gjykohen çlirimtarët, po gjykohemi ne për luftën tonë çlirimtare”, theksoi Kastrati.
Ai iu drejtua familjeve të viktimave me këto fjalë: “Të nderuara familje të të vrarëve në Masakrën e Burimit, ne jemi me ju në dhimbjen tuaj, por duhet të ndiheni krenarë për gjakun e derdhur për lirinë e vendit dhe të kombit.”
Ndërkohë, kryesuesi i Kuvendit të Komunës së Malishevës, Argjend Thaçi, në fjalën e tij tha: “Me dhimbje përkujtojmë të gjithë të rënët në këtë masakër. Ky ishte një nga krimet më të rënda që dëshmojnë gjenocidin e ushtruar mbi popullatën shqiptare. Megjithatë, përkundër këtyre vrasjeve, ne nuk u thyejmë kurrë në përpjekjen tonë për liri dhe pavarësi. Ky krim duhet të ndëshkohet dhe liria jonë do të jetojë përgjithmonë. Ne gjithmonë do t’i kujtojmë të rënët tanë për liri.”
Kryetari i degës së OVL të UÇK-së në Malishevë, Metush Kryeziu, theksoi se Masakra e Burimit është një ngjarje e paharrueshme dhe dëshmi e një hakmarrjeje dhe gjenocidi të ushtruar mbi popullatën civile. “E gjithë popullata e Malishevës dha shumë për luftën për liri, dhe pushtuesi serb u hakmor ndaj civilëve tanë. Megjithatë, asnjëherë nuk na thyen në luftën tonë për pavarësi. Ky ishte çmimi i lartë që paguam për lirinë tonë,” tha Kryeziu, duke kërkuar dënimin e autorëve të këtij krimi si dhe lirinë për çlirimtarët që padrejtësisht po gjykohen në Hagë.
Në fund, në emër të familjeve të 42 civilëve të vrarë, Adem Morina falënderoi institucionet për përkujtimin dhe kujdesin e vazhdueshëm që tregon Komuna e Malishevës ndaj të gjithë të rënëve për liri.
Burimi: botasot.info
