11
Shkup, 5 maj – Me një ceremoni të veçantë, u përurua projekti për përmirësimin e infrastrukturës arsimore në Shkollën Fillore Komunale “Jashar Bej Shkupi”, që sjell tri klasa moderne dhe tërësisht të pajisura në funksion të përmirësimit të kushteve mësimore për nxënësit.
Në këtë ngjarje morën pjesë përfaqësues të lartë të Komunës së Çairit, përfshirë kryetarin e Këshillit, z. Jetmir Asani, dhe përgjegjësin e Departamentit të Arsimit, z. Ferdi Baftija. Të pranishëm ishin edhe ambasadori i Republikës së Turqisë në Shkup, z. Fatih Ulusoy, si dhe drejtori i shkollës nikoqire, z. Rahim Maksuti.
Ky projekt u realizua me mbështetjen e Agjencisë Turke për Bashkëpunim dhe Koordinim (TİKA), dhe përfaqëson një tjetër hap konkret në drejtim të përmirësimit të cilësisë së arsimit në komunën e Çairit.
Përfaqësuesit institucionalë shprehën mirënjohje për këtë investim të rëndësishëm, duke e cilësuar atë si dëshmi të bashkëpunimit të ngushtë mes dy vendeve dhe si një kontribut të vlefshëm për edukimin e gjeneratave të reja në kushte më të mira.
BURIMI: zhurnal.mk
