Kompanitë që zhvillojnë Inteligjencë Artificiale nuk kanë plane serioze për të menaxhuar rreziqet që lidhen me Inteligjencën Artificiale të Përgjithshme, sipas një raporti nga Future of Life Institute (FLI).
Sipas indeksit të sigurisë së FLI-së, asnjë kompani nuk mori vlerësim më të lartë se D për planifikimin e sigurisë ekzistenciale.
AGI përfaqëson një fazë ku AI arrin aftësitë intelektuale të një njeriu në çdo detyrë, shkruan The Guardian.
Sipas raportit, edhe pse disa kompani pretendojnë se do të arrijnë AGI brenda dekadës, ato nuk kanë plane konkrete për të siguruar kontrollin dhe sigurinë e sistemeve të tyre.
Nga shtatë kompanitë e vlerësuara – Google DeepMind, OpenAI, Anthropic, Meta, xAI, Zhipu AI dhe DeepSeek – më e mira, Anthropic, mori notën C+. OpenAI u vlerësua me C, ndërsa Google DeepMind me C-.
Max Tegmark nga MIT, bashkëthemelues i FLI-së, krahasoi mungesën e planifikimit me ndërtimin e një centrali bërthamor pa masa sigurie. Ai theksoi se përparimet në AI po ndodhin shumë më shpejt se sa pritej.
Një tjetër organizatë, SaferAI, paralajmëroi se praktikat aktuale të menaxhimit të rrezikut janë “jashtëzakonisht të dobëta”.
Google DeepMind tha se raporti nuk pasqyron të gjitha përpjekjet e tyre për sigurinë. Kompanitë tjera janë kontaktuar për koment.
Burimi: botasot.info
