Transferimi i detyruar i fëmijëve nga Ukraina në Rusi përbën “gjenocid” , vendosi sot Këshilli i Evropës në një rezolutë të miratuar nga Asambleja e tij Parlamentare, e cila përfshin deputetë nga 46 vende.
“Dëshmia e dokumentuar e kësaj praktike korrespondon me përkufizimin ndërkombëtar të gjenocidit,” tha Këshilli i Evropës në një deklaratë pas miratimit të tekstit “që kërkon” riatdhesimin e fëmijëve.
Më 17 mars, Gjykata Ndërkombëtare Penale (ICC) lëshoi një urdhër arresti kundër presidentit rus Vladimir Putin për këto zhvendosje. Gjykata me bazë në Hagë lëshoi gjithashtu një urdhër arresti për Maria-Lvova Belova, komisionerja ruse për të drejtat e fëmijës.
Kievi vlerësoi në fillim të prillit se më shumë se 16,000 fëmijë nga Ukraina ishin “rrëmbyer” dhe dërguar në Rusi që nga fillimi i pushtimit më 24 shkurt 2022, dhe se shumë prej tyre iu dhanë familjeve kujdestare.
Sipas vendimit të miratuar sot, ka “prova” se fëmijët e dëbuar u përballën me një proces “rusifikimi” përmes riedukimit në gjuhën, kulturën dhe historinë e Rusisë.
“Këto transferime janë të planifikuara qartë dhe të organizuara në mënyrë sistematike si një politikë shtetërore dhe synojnë të eliminojnë çdo lidhje dhe çdo veçori të identitetit të tyre ukrainas”, sipas tekstit.
Në Twitter, gruaja e presidentit ukrainas, Olena Zelenska e mirëpriti këtë rezolutë, duke thënë se ishte “një hap tjetër drejt mundësisë së një gjyqi” përpara një gjykate ndërkombëtare.
Këshilli i Evropës bëri thirrje gjithashtu që OKB-ja dhe Kryqi i Kuq të kenë akses në Rusi për të mbledhur informacion rreth fëmijëve të shpërngulur dhe u bëri thirrje shteteve të mbledhin prova të krimeve përfshirë gjenocidin që mund të jenë kryer.
Konventa për Parandalimin dhe Dënimin e Krimit të Gjenocidit (1948) rendit “transferimin me forcë të fëmijëve” ndër kriteret e saj.
Pas pushtimit të Ukrainës, Rusia u përjashtua nga Këshilli i Evropës, një organizatë që vepron si kujdestare e të drejtave të njeriut në kontinent.
