Kosova dhe Serbia dialogojnë nën ndërmjetësimin e Bashkimit Evropian që nga viti 2011. Në vitet e fundit, dialogu është zhvilluar në nivel të lartë, mes liderëve të dy vendeve, dhe në nivel kryenegociatorësh.
Marrëveshja, e cila nuk është nënshkruar, është ligjërisht e detyrueshme për palët, ka thënë blloku, i cili i ka akuzuar Kosovën dhe Serbinë për mos nisjen e zbatimit të paktit.
E së fundmi është përfaqësuesi tashmë i BE-së, Peter Sorensen, i cili ka zhvilluar vizitë në Kosovë dhe Serbi për të u informuar për së afërmi me palët që do të negociojë.
Në takimin mes Sorensen dhe Vuçiq u bënë me dije disa nga pikat më kryesore që u biseduan, e që ishte edhe Asociacioni.
Vuçiq tha se takimi i tij i parë me të dërguarin e ri për dialogun ishte “i hapur dhe i drejtë”.
Presidenti serb e akuzoi Kosovën se po bën “pengesa të vazhdueshme në procesin e dialogut”, duke ripërsëritur se themelimi i Asociacionit të komunave me shumicë serbe në Kosovë “është parakusht për fillimin e një normalizimi thelbësor të marrëdhënieve”.
Natyrisht që Asociacioni është një nga kërkesat e vazhdueshme që Vuçiq bënë ndaj Kosovës, mirëpo për të njëjtën nuk ka marrë sinjale pozitive nga Kosova.
Mirëpo, të gjendur në këtë situatë, si do ta trajtojë këtë çështje Sorensen, kur dimë që sapo ka filluar përfaqësimin e BE-së?
Shabani: Synimet e Vuçiqit janë tendencioze
Në lidhje me këtë temë në një prononcim për “Bota sot”, ka folur njohësi i çështjeve ndërkombëtare, Amir Shabani.
Ai thotë se kërkesat e tilla nga Vuçiq na tregojnë edhe njëherë që i njëjti nuk ka angazhim minimal për paqe mirëpo ka tendencë të e vazhdoj konfliktin shumëvjeçar.
“Kërkesat e paarsyeshme të presidentit Vuçiq janë dëshmi e qartë se ai nuk e bën as angazhimin minimal për sigurimin e paqes dhe stabilitetit në rajonin e Ballkanit Perëndimor, përkundrazi, çdo qasje e tij në këtë drejtim është tendencioze dhe e mban të freskët konfliktin shumëvjeçar”, u shpreh ai.
Më tej, njohësi i çështjeve ndërkombëtare thotë që Vuçiq përmes Asociacionit mendon të realizoj projektin e një “Republike Srpska” e për të njëjtën gjë Sorensen nuk duhet të lejojë të themelohet.
“Tani më dihet se insistimi i tij për themelimin e Asociacionit të Komunave Serbe në Republikën e Kosovës është faktikisht plan tinzar për realizimin e projektit të një “Republika Srpska” edhe në Kosovë, siç e realizoi në Bosnjë dhe Hercegovinë dhe ky vend mbeti pezull sa i përket institucionalizimit të plotë dhe eurointegrimit.
Sorensen në këtë rast nuk duhet lejuar hapësirë debati për çështjen në fjalë, pasi që shteti që ka shkaktuar konflikt dhe gjenocid duhet kërkuar falje dhe duhet pranuar kushtet që i vihen, e jo të vendojë kushte për negocim”, foli Shabani për “Bota sot”.
Duhanaj: Kosova duhet urgjentisht të kthehet në binarët e marrëdhënieve të mira diplomatike
Ndërsa, analisti politik, Leon Duhanaj në një bashkëbisedim me “Bota sot”, tha se Asociacioni tashmë është pranuar nga të gjitha palët, por ajo që duhet të definohet është statute mbi të cilin do të themelohet.
Sipas tij, jemi me fat që në marrëveshjen e 2015-ës, e kemi të negociuar formën se si do vendoset.
“Kur flasim për Asociacionin e komunave me shumicë serbe, duhet patur një gjë parasysh. As Kosova e as komuniteti ndërkombëtarë, nuk kanë diçka kundër. Madje asociacioni si mundësi, është i pranuar nga të gjithë. Ajo çfarë duhet të definohet qartë, është forma, gjegjësisht statuti mbi të cilin do të themelohet. Në ketë pikë kemi probleme dhe për mendimin tim, jo pa fajin tonë. Ne përveç se jemi vonuar në draftimin e një statuti, kemi lejuar që ketë statut të na servojnë të tjerët në tavolinë. Tani duhet të përballemi me mundësinë e ndryshimit të këtij drafti. Jemi me fat që në marrëveshjen e 2015-ës, e kemi të negociuar formen se si do vendoset. Në atë marrëveshje është e precizuar qartë se statusi duhet të kaloj nëpër Gjykatën Kushtetuese të Republikës së Kosovës. Çdo formë tjetër, është jokushtetuese dhe e papranueshme. Në ketë kontekst, jemi të mbrojtur”, thotë analisti.
Në fund, ai kërkon nga Kosova që të ketë më shumë përkushtim në marrëdhëniet e ndërkombëtare dhe të këmbëngul që çdo marrëveshje të jetë gjithëpërfshirëse, jo parciale.
“Kosova duhet urgjentisht të kthehet në binarët e marrëdhënieve të mira diplomatike. Të largohet nga rruga konfrontuese, dhe sanksionuese. Të këmbëngul se çdo zgjidhje e mundshme të jetë edhe gjithëpërfshirëse, jo parciale. Ose dakordohemi për gjithçka, përfshirë edhe njohjen e ndërsjellë, ose për asgjë. Ky duhet të jetë çelësi i dialogut, për ndryshe nuk do shkojmë drejtë zgjidhjes”, përfundoi Duhanaj për “Bota sot”.
Burimi: botasot.info
