Deputeti i PD, njëherësh anëtar i Komisionit të Rithemelimit Belind Këlliçi ka folur për zgjedhjet e pjesshme vendore që do mbahen në datën 6 mars si dhe koalicionin me LSI që e kanë emëruar si “Shtëpia e Lirisë”.
Në një intervistë për media, Këlliçi deklaroi se Sali Berisha ka mbajtur PD-në në pushtet për 13 vjet, duke shtuar se Lulzim Basha nuk ka për qëllim fitoren.
Ai shton se kandidatët që dolën nga primaret janë të gjithë produkt i PD, ndërsa koalicionin e sheh si mënyrën e duhur për tu kthyer qytetarëve administrimin lokal.
“Basha është zgjedhur kryebashkiak në Tiranë falë nesh. Lulzim Basha thoshte dikur se na duhet LSI si koalicion e sot ndryshon fjalët. Sa herë që PD ka pasur drejtues Sali Berishën, pritej fitorja. Berisha e mbajti PD-në 13 vjet në pushtet, kurse Basha do të marrë më shumë vota se në zgjedhjet më parë. Basha nuk ka qëllim fitoren.
Qytetarët e dinë se kush bashkëpunon me Ramën. Ne jemi opozita e vërtetë, që do të luftojmë regjimin e Edi Ramës. Bardh Spahia e të gjithë janë produkt të PD-së. Shtëpia e lirisë është këtu për t’ju dhënë qytetarëve administratorë të qyteteve, gjë që është shumë e rëndësishme”, deklaroi Këlliçi.
