Shiriti i kapitenit në një skuadër është një simbol i rëndësishëm, pasi përfaqëson liderin. Kur Manchester United mori Harry Maguire nga Leicester, jo vetëm e pagoi 90 milionë euro, por investoi dhe te autoriteti i tij, duke i dorëzuar shiritin. Një gjest që nuk u vlerësua nga të gjithë, duke qenë se në skuadër kishte njerëz, De Gea mbi të gjithë me më shumë përvojë se mbrojtësi.
Pastaj erdhi dhe Ronaldo, dhe në sezonin e kaluar, shumëkush kishte sugjeruar se ishte portugezi ai që meritonte rolin e liderit dhe shiritin, por tani gjërat kanë ndryshuar. Maguire është në planet e Ten Haag, ndërsa portugezi kërkon largimin. Vetë Maguire ndërkohë kur ju kërkua një opinion në lidhje me Ronaldon ndërhyri në mbrojtje si një kapiten i vërtetë.
“Cristiano është një futbollist i shkëlqyer dhe edhe një person i mrekullueshëm në dhomat e zhveshjes. Unë e di mirë se çfarë do të thotë të rrethohesh nga spekulimet e medias, por ai pëson edhe më shumë se unë. Gjithçka që bën vihet në lupën e mediave“.
E vështirë të mos t’i japësh të drejtë mbrojtësit që nuk duket aspak i prekur nga polemikat për rolin e tij të kapitenit, përkundrazi, e kupton mirë se kritikat konstante nuk ndihmojnë, madje as dikë si Cristiano Ronaldo.
Gjithsesi duhet marrë në konsideratë se të dy e dinë, se kur vesh fanellën e Man United vihesh në qendër të vëmendjes mediatike, siç demonstronte së fundmi edhe klasifikimi i lojtarëve të Premier League që kishin marrë më tepër fyerje në rrjetet sociale, një klasifikim ky i dominuar nga lojtarët e Manchester United.
