Vihet në pranga një 28-vjeçar që shpërndante lëndë narkotike, në subjektin ku tregtonte materiale ndërtimi.
Sekuestrohet 1 kilogram lëndë e dyshuar narkotike cannabis sativa, në formë çokollate.
Specialistët e Seksionit për Hetimin e Narkotikëve, të DVP Durrës, në vijim të punës për goditjen e veprimtarisë kriminale në fushën e narkotikëve, pas një hetimi me metoda proaktive, bazuar dhe në informacionet e siguruara nga inteligjenca informative, për një shtetas që shiste lëndë narkotike, kanë organizuar dhe finalizuar operacionin “December”, për lokalizimin dhe kapjen e tij.
Si rezultat i këtij operacioni u arrestua në flagrancë shtetasi D. D., 28 vjeç, banues në Krujë.
Gjatë kontrollit të ushtruar në subjektin në pronësi të këtij shtetasi, me fushë veprimtarie tregtim i materialeve të ndërtimit, shërbimet e Policisë gjetën dhe sekuestruan 1 kilogram lëndë të dyshuar narkotike cannabis sativa, në formën e çokollatës.
Nga veprimet hetimore dyshohet se ky shtetas e siguronte lëndën narkotike, nëpërmjet automjeteve të transportit publik.
Materialet i kaluan Prokurorisë, për veprime të mëtejshme.
