Armëpushimi do të hyjë në fuqi nga sot dhe do të zgjasë deri më 22 prill.
Junta ushtarake e Mianmarit ka shpallur një armëpushim të përkohshëm në operacionet kundër grupeve të armatosura rebele, pas tërmetit shkatërrues të javës së kaluar.
Armëpushimi do të hyjë në fuqi nga sot dhe do të zgjasë deri më 22 prill, njoftoi junta sonte (me orën lokale), sipas televizionit shtetëror MRTV.
Armëpushimi “ka për qëllim përshpejtimin e përpjekjeve të ndihmës dhe ruajtjen e paqes dhe stabilitetit” pas tërmetit të së premtes, thuhet në deklaratë.
Në të njëjtën kohë, u bë e ditur se gjenerali Min Aung Hlaing, lideri i juntës, do të udhëtojë nesër, të enjten në Tajlandë, për një samit rajonal me pjesëmarrjen kryesisht të vendeve të Azisë Jugore.
Gjenerali do të informojë liderët e këtyre vendeve në Bangkok për situatën në Mianmar pas tërmetit.
Mianmari mbetet i zhytur në konflikt civil pas grushtit të shtetit të 1 shkurtit 2021, kur ushtria mori pushtetin, duke përmbysur qeverinë e zgjedhur të laureates së Çmimit Nobel për Paqe, Aung San Suu Kyi.
Dhjetëra grupe të armatosura të pakicave etnike dhe kundërshtarë politikë të juntës mbeten aktive në vend, shumë prej të cilave kanë marrë kontrollin e zonave të Mianmarit.
Lufta civile i ka dhënë një goditje të rëndë ekonomisë dhe i ka çuar shërbimet thelbësore në prag të kolapsit.
Tërmeti më i fortë prej 7.7 ballë të premten e kaluar ka marrë jetën e të paktën 2,886 njerëzve në vend, sipas të dhënave të fundit të përkohshme të juntës.
Tërmeti shkaktoi gjithashtu viktima në Tajlandën fqinje, si dhe dëme të mëdha në të gjithë rajonin.
Burimi: botasot.info
