Deputeti shqiptar në Parlamentin e Serbisë, Shaip Kamberi i ka reaguar presidentit të Serbisë, Aleksandër Vuçiq pas deklaratës së tij në Nish, ku tha se “mund të jetojmë në shumë shtete, por kemi emrin e mbiemrin serb dhe një flamur”.
Ai tha se e njëjta e vërtetë qëndron edhe për shqiptarët, pavarsisht se Vuçiq nuk dëshiron ta pranoj, me shkas të cilin edhe e pyeti në reagimin e tij në “Facebook”, se përse ka standarde të dyfishta të cilat nuk ndërtojnë paqe.
“Për çfarë arsye atëherë konsideroni se disa të drejta janë veç për serbët? Pse të drejtat e njëjta nuk ia pranoni shqiptarëve në Serbi? Pse atëherë dënohen shqiptarët kur përdorin simbolin e vet kombëtar? Pse shqiptarëve në Luginë të Preshevës nuk i njihet e drejta për përdorim zyrtar të gjuhës amtare në organet shtetërore?”, e pyeti Kamberi.
Postimi i plotë
Një komb me një gjuhë e një flamur jemi edhe ne
“Mund të jetojmë në shumë shtete, por kemi emrin e mbiemrin serb dhe një flamur” ka thënë presidenti i Serbisë, Aleksandar Vuçiq, gjatë një manifestimi në Nish.
Njësoj edhe ne zoti president.
Jetojmë në pesë shtete por vazhdojmë të jemi një komb- jemi shqiptarë.
Njësoj edhe ne kemi një flamur.
Njësoj edhe ne kemi një gjuhë.
Atëherë me cilën arsye konsideroni se disa të drejta janë veç për serbët?
Pse të drejtat e njëjta nuk ia pranoni shqiptarëve në Serbi?
Pse atëherë dënohen shqiptarët kur përdorin simbolin e vet kombëtar?
Pse shqiptarëve në Luginë të Preshevës nuk i njihet e drejta për përdorim zyrtar të gjuhës amtare në organet shtetërore?
Standardet e dyfishta nuk ndërtojnë paqe. Të drejtat janë univerzale. Ju nuk e keni monopolin e shpërndarjes së tyre.
