Ndërsa Kameruni përgatitet për ndeshjen e tyre vendimtare kundër Brazilit, kombëtarja afrikane do të shpresojë të imitojë trajnerin e tyre Rigobert Song për të kapërcyer pengesat.
Song me siguri do të mbahet mend si një nga yjet më të ndritur të Kamerunit së bashku me ish-shokun e skuadrës Samuel Eto’o. Ish-mbrojtësi i Liverpool-it ka luajtur në katër Kupa të Botës si lojtar dhe aktualisht është duke u paraqitur në të pestën, në rolin e tij si trajner i Kamerunit, shkruan Telesporti.
I njohur për modelin e flokëve dhe mjekrën e verdhë, Song u emërua si trajner kryesor i Kamerunit në shkurt në fillim të këtij viti duke zëvendësuar trajnerin portugez Toni Conceicao.
Song më pas kapërceu një provë të ashpër kundër Algjerisë, duke e ndihmuar Kamerunin të sigurojë vendin e tij në Kupën e Botës 2022.
Ndërsa Song nuk është i panjohur për t’i bërë ballë momenteve të presionit të madh, arritja e tij më e madhe deri më tani duhet të jetë rikuperimi i tij pas një infarkti në 2016.-ën Song ka pranuar për L’Equipe se ishte qeni i tij që në fund i shpëtoi jetën.
“Po shikoja televizor, por u ndjeva shumë i lodhur”, tha Song për L’Equipe. “E lashë derën hapur sepse prisja një vizitor. Nëse do të ishte mbyllur, kishte mbaruar sepse familja ime ishte në Paris. Qeni im duhet të ketë ndjerë diçka dhe ka filluar të lehë. Pastaj erdhi personi që prisja dhe më pa të shtrirë në dysheme”.
Pas goditjes në tru, Song pati vështirësi për të siguruar vëmendjen e nevojshme spitalore që i nevojitej dhe falënderon presidentin e atëhershëm Paul Biya dhe familjen e tij për mbështetjen e tyre.
“Pa atë [Biya] ose gruan e tij, nuk do të isha këtu sot. Nuk mund të jem mjaftueshëm mirënjohës”, vazhdoi Song. “Presidenti i Kamerunit i tha familjes sime se ai do të kujdesej për gjithçka dhe më pagoi avionin për në Paris”.Teksa ishte në gjendjen kome, Song thotë se kishte një sërë vizionesh që përfundimisht e ndihmuan të kthehej në jetë, duke përfshirë një takim me babanë e tij që vdiq kur Rigobert ishte ende fëmijë.
“Ishte si një ëndërr,” tha Song. “U ribashkova me paraardhësit e mi. Babai më vdiq kur isha 9 vjeç, por unë e njoha. Më tha: ‘Çfarë po bën këtu? Duhet të kthehesh’”.
Song do të shpresojë t’ia përcjellë këtë shpirt luftarak lojtarëve të tij kur Kameruni të përballet me Brazilin më 3 dhjetor. Kombi afrikan ka kaluar vetëm një herë në fazën me eliminim direkt gjatë Kupës së Botës 1990 në Itali.
