Qeveria japoneze konfirmoi gatishmërinë për të ofruar një pjesë të rezervave të saj të gazit natyror për të zbutur krizën energjetike në Evropën e përfshirë nga tensionet gjeopolitike mbi çështjen ukrainase.
Dje, ministri japonez i Ekonomisë, Koichi Hagiuda u takua me përfaqësuesen e BE-së në Japoni, Patricia Flor, si dhe ambasadorin e ri amerikan, Rahm Emanuel, duke i siguruar për furnizimet me gaz, raporton atsh.
“Në Evropë muajin e ardhshëm do të mbërrijnë disa cisterna të gazit natyror të lëngshëm”, theksoi Hagiuda pa specifikuar sasitë e pritshme.
Tokio do t’u kërkojë kompanive vendase për të vënë në dispozicion furnizime për Kontinentin e Vjetër duke garantuar se edhe rezervat për vendin do të ishin të mjaftueshme.
Japonia, e privuar nga lëndët e para, deri në vitin 2021 ishte importuesja e parë e gazit në botë, dhe sipas analistëve, kontributi i saj do të jetë i limituar për të mos prekur autonominë e saj.
Kriza ruso-ukrainase mund të ofrojë një treg të ri për SHBA-në, që në pak muaj është bërë një nga eksportueset më të mëdha të gazit natyror në botë.
